Mədəniyyət naziri Adil Kərimli Özbəkistan nümayəndə heyəti ilə görüşüb
Dekabrın 16-da baş tutan görüşdə nümayəndə heyətini səmimi salamlayan nazir Adil Kərimli Özbəkistan Mədəniyyəti Günlərinin yenidən Azərbaycanda təşkil olunması münasibətilə təbriklərini çatdırıb. O bildirib ki, Azərbaycanda özbək xalqının mədəniyyətinə və ədəbiyyatına hər zaman böyük maraq və rəğbət göstərilib. Bu bağlılıq xalqlarımızın etnik-mədəni birliyi, tarixi dostluq və qardaşlıq münasibətləri ilə bağlıdır.
Görüşdə vurğulanıb ki, iki ölkə prezidentləri arasında mövcud olan dostluq münasibətləri mədəni-humanitar sahədə əməkdaşlığın inkişafında mühüm rol oynayır. Qeyd edilib ki, Azərbaycan və Özbəkistan arasında mədəni əməkdaşlıq ildən-ilə genişlənir, qarşılıqlı mədəniyyət günləri, bədii kollektivlərin qastrol səfərləri və yaradıcılıq qurumları arasında əlaqələr uğurla davam etdirilir.
Özbəkistan mədəniyyət nazirinin birinci müavini Bahadur Əhmədov mədəniyyət günlərinin yüksək səviyyədə təşkili və göstərilən qonaqpərvərliyə görə Azərbaycan tərəfinə təşəkkürünü bildirib.
Söhbət zamanı mədəni əməkdaşlığın perspektivləri müzakirə olunub, dekabrın 15-də Bakıda keçirilən Azərbaycan–Özbəkistan Birgə Mədəniyyət Komissiyasının ilk iclasının əhəmiyyəti xüsusi vurğulanıb. Bu formatın iki ölkə arasında mədəni əlaqələrin inkişafında yeni mərhələ açacağına əminlik ifadə olunub.
09:40 17.12.2025
Oxunuş sayı: 1434
