Paşinyandan Azərbaycanla bağlı ilk: Niyə bunu etdi?
Ermənistanın baş naziri Nikol Paşinyan Azərbaycan Respublikası və Azərbaycan xalqını Qurban bayramı münasibətilə təbrik edib.
Bu barədə Paşinyan rəsmi “X” hesabında paylaşım edib.
“Azərbaycan Respublikasını və Azərbaycan xalqını Qurban bayramı münasibətilə təbrik edirəm. Ölkələrimizə və xalqlarımıza sülh, rifah və tərəqqi arzulayıram,” – deyə o, qeyd edib.
Bu, Paşinyanın Qurban bayramı Azərbaycana ilk təbrikidir.
Əlbəttə, bu cür paylaşımlar hər şeydən əvvəl ictimai rəyə hesablanmış addımlardandır. Nəzərə almaq lazımdır ki, Azərbaycanla Ermənistan arasında normallaşma prosesi ləng getsə də, davam edir. Sülh sazişi ilə bağı rəsmi Bakının iki əsas tələbi var: Ermənistanın Azərbaycana qarşı ərazi iddialarını ehtiva edən konstitusiyasını dəyişdirməsi və ATƏT-in Minsk Qrupunun ləğvi. Rəsmi İrəvan hələ ki bu şərtlərlə bağlı ciddi addımlar atmır. Bunun bir neçə səbəbi var.
Ermənistan hakimiyyətinin ciddi siyasi iradə ortaya qoya bilməməsinin bir səbəbi də ictimai rəydir. Belə ki, iqtidar əvvəlcə xalqı buna hazırlamalıdır. Elə vəziyyət yaranmalıdır ki, xalq hakimiyyətin taleyüklü addımlarını dəstəkləsin, kənar qüvvələrin diktəsinə və təhrikinə təslim olmasın. Fikrimcə, Paşinyan məhz buna çalışır.
Doğrudur, Paşinyanın bu ritorikası birmənalı qarşılanmır. Hətta o, satqınlıqda ittiham olunur. Buna baxmayaraq, baş nazir ictimai şüuru formalaşdırmağa davam edir. Çünki başqa yolunun olmadığını anlayır.
Məlum olduğu kimi, Qurban bayramı müsəlmanların xüsusi bayramlarındandır. Düşünmək olar ki, Paşinyanın məhz belə bir vaxtda Azərbaycan xalqını təbrik etməsi həm də dini motivli qarşıdurmanı aradan qaldırmaq cəhdidir.
Yəqin ki, Ermənistan iqtidarının hazırkı ritorikası, oxşar addımlar bundna sonra da davam edəcək. Amma bu dinamikanın təzyiqlə üzləşməsi gözləniləndir.
Kənan Novruzov
12:18 07.06.2025
Oxunuş sayı: 1766
