“Don Rafael Trombonçu” tamaşası yenidən Gənc Tamaşaçılar Teatrının səhnəsində
Azərbaycan Dövlət Milli Gənc Tamaşaçılar Teatrının səhnəsində Xalq artisti Cənnət Səlimovanın quruluşunda hazırlanan “Don Rafael Trombonçu” tamaşası növbəti dəfə nümayiş olunub.
Komediya janrında təqdim edilən səhnə əsərində baş rolları Əməkdar artistlər Şövqi Hüseynov, Gülər Nəbiyeva və Nofəl Vəliyev ifa edirlər. Tamaşa çətin həyat şərtləri içərisində var-gücü ilə mübarizə aparan musiqiçi Don Rafaelin tragikomik taleyindən bəhs edir.
Əsərin əsas qəhrəmanı – Don Rafael bir vaxtlar opera və balet əsərləri yazmış, indi isə musiqi alətləri mağazasını işlədən trombonçudur. Lakin onun həyatı sənət dünyasındakı uğurlarından çox uzaqdır. Ailəsi ilə birlikdə səfalət içində yaşasa da, Don Rafael bu acı reallığı müxtəlif yollarla gizlətməyə çalışır. Nimdaş geyimini təmir etməklə, köhnə paltarlarını bəzəyib yeni kimi göstərməklə o, həm özünü, həm də ətrafındakıları aldatmağa çalışır.
Səhnə əsəri tamaşaçını Don Rafaelin musiqisi və yaradıcılığı ilə deyil, onun gündəlik məişət problemləri, ailədaxili münasibətləri və cəmiyyətlə olan çətin münasibətləri ilə tanış edir. Gülüş və kədərin bir arada olduğu bu tamaşa, incəsənətə və sənətkar taleyinə fərqli baxış təqdim edir.
Ayan Sədi
11:00 07.04.2025
Oxunuş sayı: 1233
