Xalq şairi Rəsul Rzanın məzarı ziyarət olunub
Xalq şairi Rəsul Rzanın vəfatının 44-cü ildönümü ilə əlaqədar Azərbaycan Yazıçılar Birliyinin sədri Anar başda olmaqla qurumun rəhbərliyi, mərhumun ailə üzvləri, dostları və poeziya həvəskarları şairin Fəxri xiyabandakı məzarını ziyarət ediblər.
Qələm adamları Xalq şairi Rəsul Rzanın məzarı üzərinə tər güllər düzüb, onun xatirəsini anıblar.
Mərasimdə Nizami Gəncəvi adına Milli Azərbaycan Ədəbiyyatı Muzeyinin direktoru, Rəsul Rza Fondunun sədri akademik Rafael Hüseynov unudulmaz şairin zəngin yaradıcılığından söz açıb, onunla bağlı xatirələrini bölüşüb. O, Rəsul Rzanın ədəbiyyatımızda öz sözü, yeri, fərdi yaradıcılıq siması və orijinal yazı manerası ilə başqa qələm yoldaşlarından fərqləndiyini vurğulayıb: "Böyük Rəsul Rza ilə ayrılığın 44-cü ili bitdi. Onun bu mayda gələcək 115 yaşını onsuzluğun 45-ci ili qarşılayacaq. Onsuzluğun hər ilində şəxsiyyətinin də, sözünün də yeri həmişə görünüb və nə qədər ki, insanımızda şeirə sevgi, sözün gücünə sayğı var, Rəsul Rza yeri daim görünəcək də. Dünya tanınmayacaq qədər dəyişilməyəcəksə, köhnə insan vərdişləri yenə var olacaqsa, bəşər övladı süni intellektin tam əsarətinə düşməyəcəksə, Rəzul Rzaya və Rəsul Rzalara ehtiyac mütləq yenə qalacaq. O ehtiyac yaşadıqca isə, biz olduq-olmadıq, nə məzarının üstündən çiçəklər əskik olacaq, nə də Rəsul Rzanın sevənləri tükənəcək".
14:22 01.04.2025
Oxunuş sayı: 9485
