"Mən gəldim, qızlar" tamaşası yenidən səhnədə
Azərbaycan teatr səhnəsində psixoloji dram janrında tamaşa nümayiş etdirilir. İsveç dramaturqu Lars Nurenin “Müharibə” pyesi əsasında hazırlanan “Mən gəldim, qızlar” tamaşası izləyicilərə dərin sosial və insani mövzular ətrafında düşündürücü bir səhnə təcrübəsi təqdim edir.
Tamaşanın quruluşçu rejisoru Əməkdar incəsənət xadimi Bəhram Osmanov əsas rolların ifaçısı isə Xalq artisti Qurban İsmayılov və Əməkdar artist Kəmalə Müzəffərdir. Səhnə əsəri müharibənin fərdi və ailəvi talelərə vurduğu ağır zərbələrdən, insan iradəsinin sınaqlardan necə keçməsindən bəhs edir.
İki illik müharibədən sonra evinə qayıdan, lakin dünyası tamamilə dəyişmiş bir ata – müharibədə gözlərini itirmiş, lakin ruhən sınmayan bir insanın həyat mübarizəsi tamaşanın əsas süjet xəttini təşkil edir. O, dağılmış ailəsini bir araya gətirmək və yaşanan faciələrin öhdəsindən gəlmək üçün səbr və iradə nümayiş etdirir. Tamaşa həm də insanları düzlüyə, təmkinli olmağa səsləyir.
İki hissədən ibarət səhnə əsəri 16 yaşdan yuxarı tamaşaçılar üçün nəzərdə tutulub və milli, irqi, dini mənsubiyyətdən asılı olmayaraq, hər bir millətin üzləşə biləcəyi ağır sınaqları əks etdirir.
Ayan Sədi
09:58 23.03.2025
Oxunuş sayı: 1632
