Xalqın şairi - Səməd Vurğun
21 mart... Baharın gəlişi, həyatın yenilənməsi, təbiətin oyanışı... Bu tarix Azərbaycan üçün təkcə Novruz bayramının sevinci ilə deyil, eyni zamanda böyük şairin doğuluş günü ilə əlamətdardır. 1906-cı ilin bu günü Qazaxın Yuxarı Salahlı kəndində dünyaya göz açan şəxsiyyət öz adını təkcə poeziya aləmində deyil, elmin, təşkilatçılığın, milli düşüncənin ən parlaq səhifələrində də qızıl hərflərlə yazdırdı. Bu şəxsiyyət Səməd Vurğundur!
Səməd Vurğun elə bir şair idi ki, onun misralarında Azərbaycan torpağının hər zərrəsi, xalqın hər nəğməsi, hər arzusu əks olunmuşdu. O, xalqın dərdini danışan, ümidini yaşadan, sevincini, kədərini bölüşən bir söz sərkərdəsi idi. Onun qələmindən süzülən misralar yeri-göyü titrədən səmimi bir sevgi ilə yoğrulmuşdu. O sevgi ki, "Azərbaycan" şeirində vətənin hər daşı, torpağı, dağları, çayları ilə səslənirdi:
"Sən mənimsən, mənimçünsən, anayam,
Namusumsan, vicdanımsan, arayam!"
Səməd Vurğun təkcə şair deyildi. O, böyük bir alimdi, nəzəriyyəçidir, təşkilatçıdır. Azərbaycan Elmlər Akademiyasının yaradılmasının təşəbbüskarlarından biri kimi elmi irəliləyişlərdə də əvəzsiz xidmətlər göstərmişdi. Onun akademik fəaliyyəti göstərir ki, Səməd Vurğun təkcə qəlbini şeirlə yoğuran deyil, eyni zamanda elmin, maarifin inkişafına xidmət edən bir ziyalı idi. Onun fəlsəfi düşüncələri, insan həyatına, cəmiyyətə baxışı "İnsan" dramında öz parlaq əksini tapmışdı.
Şairin ömür yolu asan olmayıb. Erkən yaşlarından ailəsinin ağır sınaqları ilə üzləşsə də, möhkəm iradəsi və fitri istedadı onu heç vaxt yolundan sapdırmadı. Vaqifin, Vidadinin, Sabirin, Puşkinin, Lermontovun misraları ilə ruhlanan gənc Səməd özünün də tarixə yazılacaq misralarını yaratmağa başladı. Və zaman keçdikcə, onun hər bir misrası milyonların yaddaşına həkk olundu.
Səməd Vurğun öz xalqına olan sevgisini təkcə sözlə deyil, həm də əməli ilə göstərdi. O, İran Azərbaycanı ilə mədəni əlaqələrin qurulmasında, ədəbiyyatın inkişafında, ana dilinin qorunmasında əhəmiyyətli işlər gördü. Xalqın maariflənməsi, milli ruhun güclənməsi üçün canını qoydu. Elə buna görə də, o, təkcə xalq şairi deyil, xalqın vicdanı oldu!
Səməd Vurğun təkcə bir dövrün deyil, bütün zamanların şairidir. Onun poeziyası nə zamansa köhnəlməyəcək, onun adı heç zaman unudulmayacaq. Çünki o, Azərbaycan ədəbiyyatının təməl daşlarından biridir.
Bu gün, onun doğum günündə, baharın nəfəsi ilə birlikdə onun ruhunu yad edirik. Bu gün biz təkcə bir şairin yox, bütöv bir poeziya çinarının kölgəsində dayanırıq.
Ayhan Ağarzayev
13:30 21.03.2025
Oxunuş sayı: 3674
