İğdır şəhər Xalq Kitabxanasına Azərbaycana dair zəngin kitab kolleksiyası hədiyyə edilib
Azərbaycan Respublikasının Türkiyədəki səfirliyi nəzdindəki Azərbaycan Mədəniyyət Mərkəzinin layihəsi ilə Türkiyənin İğdır şəhər Xalq Kitabxanasına Azərbaycana dair zəngin kitab kolleksiyası hədiyyə edilib. Nəşrlər arasında tariximiz, dövlətçiliyimiz və mədəniyyətimizə aid nəşrlər, eləcə də Azərbaycan Mədəniyyət Mərkəzinin layihəsi klassiklərimizin Türkiyə türkcəsinə tərcümə edilmiş əsərləri yer alır.
Azərbaycan Mədəniyyət Mərkəzinin direktoru Samir Abbasov İğdır şəhər Xalq Kitabxanasında İğdır şəhər Valisinin müavini Akın Oruç, şəhər Mədəniyyət və Turizm müdiri Nebi İşık, xalq kitabxanasının müdiri Adem Eşinlə görüşmüşdür.
Görüşdə İğdırda milli mədəniyyətimizin, tariximizin, ortaq dəyərlərimizin təbliği, İğdır şəhər Xalq Kitabxanasında Azərbaycan fondunun yaradılması, hər il keçirilən İğdır kitab Sərgisinə Azərbaycan tərəfinin iştirakı, Azərbaycan klassiklərinə dair təqdimatların təşkili, kitabxananın musiqi şöbəsində Üzeyir Hacıbəyli guşəsinin qurulması, Azərbaycan milli musiqi aləti olan tarın İğdır gözəl sənətlər liseyində tədrisi, aşıq - ozan sənətinə dair ortaq layihənin reallaşdırılması və s. müzakirə edilmiş və bu istiqamətdə birgə iş aparılması razılaşdırılmışdır.
Sonda kitabxananın şöbələri ziyarət olunmuş, müasir oxu zalları, uşaq və gənclər bölümü, habelə kitabxanada xalça toxunmasını öyrədən “Qarabağ kilim” mərkəzi ziyarət olunub və onlar haqqında məlumat verilib. (Azərtac)
05:04 19.03.2025
Oxunuş sayı: 792
