Milli Teatr Günü Akademik Milli Dram Teatrında təntənəli şəkildə qeyd olundu
10 martda Akademik Milli Dram Teatrında Milli Teatr Günü münasibətilə tədbir keçirilib. Mədəniyyət Nazirliyi, Dövlət Televiziya və Radio Verilişləri QSC, Azərbaycan Teatr Xadimləri İttifaqı və Akademik Milli Dram Teatrının birgə təşkilatçılığı ilə gerçəkləşən tədbirə teatr ictimaiyyətinin nümayəndələri və sənətsevərlər qatılıblar.
Gecə Dövlət Rəqs Ansamblının çıxışı ilə başlayıb. Tədbirin aparıcıları – Əməkdar artist Elşən Cəbrayılov və aktrisa Nəzrin Abdullayeva qonaqları salamlayaraq Milli Teatr Gününün əhəmiyyətindən bəhs ediblər.
“Bölgə teatrlarının Bakı premyeraları” layihəsinə yekun vurulub
Bayram tədbiri çərçivəsində Azərbaycan Mədəniyyət Nazirliyi və Dövlət Televiziyasının dəstəyi ilə keçirilən “Bölgə teatrlarının Bakı premyeraları” layihəsinin yekun nəticələri açıqlanıb. Layihə çərçivəsində 11 teatr ümumilikdə 16 tamaşa təqdim edib. Tədbirdə layihə iştirakçıları mükafatlandırılıb.
Teatr xadimləri mükafatlandırılıb
Azərbaycan Teatr Xadimləri İttifaqı teatr sənətinin inkişafında xidmətləri olan sənətkarları mükafatlandırıb. İttifaqın sədri, Xalq artisti Hacı İsmayılov yeni təsis edilən “Teatr fədaisi” medalını təqdim edib. Xalq artistləri İlham Namiq Kamal və Azad Şükürov “Ümid”, “Qızılgül”, “Teatr xadimi” və “Sənətkar” mükafatlarını sahiblərinə təqdim ediblər.
Bundan əlavə, Gürcüstanın Şota Rustaveli adına Milli Teatrının bədii rəhbəri Robert Sturua və teatrın direktoru Giorgi Tevzadze də mükafatlandırılıblar.
“İblis və...” tamaşasına “Qızıl Dərviş” mükafatı təqdim olunub
Tədbir çərçivəsində Akademik Milli Dram Teatrının səhnələşdirdiyi “İblis və...” tamaşası “Qızıl Dərviş” mükafatına layiq görülüb. Tamaşanın rejissoru Mehriban Ələkbərzadəyə mükafat təqdim edilib.
Sonda Mehriban Ələkbərzadə çıxış edərək teatrsevərləri bayram münasibətilə təbrik edib və Azərbaycan teatrının gələcək uğurlarına inamını ifadə edib.
Milli Teatr Günü münasibətilə təşkil olunan tədbir Azərbaycan teatr sənətinin zəngin ənənələrini yaşatmaq və inkişaf etdirmək istiqamətində mühüm addımlardan biri kimi qiymətləndirilib.
Ayan Sədi
21:05 11.03.2025
Oxunuş sayı: 2110
