Akademik Musiqili Teatrın tamaşası Lənkəranda alqışlarla qarşılanıb
Mədəniyyət Nazirliyinin regionlarda qastrol səfərlərinin təşkil edilməsi barədə əmrinə əsasən Azərbaycan Dövlət Akademik Musiqili Teatrının yaradıcı heyəti Lənkəranda olub.
Lənkəran Dövlət Dram Teatrının səhnəsində kollektivin uğurla nümayiş etdirdiyi “Molla Nəsrəddinin beş arvadı” (İ.Sadıqov, quruluşçu rejissoru Əməkdar incəsənət xadimi Əsgər Əsgərov) komediyası alqışlarla qarşılanıb.
Qeyd edək ki, türk dünyasının kamillik, müdriklik simvolu olan Molla Nəsrəddinin beş arvadı ilə macəralarından bəhs edən bu gülüş dolu tamaşada teatrın sevilən simaları Əməkdar artistlər Əkbər Əlizadə, İqrar Salamov, aktyorlar Gülcahan Salamova, Ülviyyə Əliyeva, Gülnarə Abdullayeva, Gülnarə Əzizova, Türkel Tariqpeyma, Əliməmməd Novruzov, Fərid Rzayev, Ruslan Mürsəlov iştirak ediblər.
20:14 05.03.2025
Oxunuş sayı: 1411
