Türk xalqlarının folklorunun öyrənilməsi üzrə əməkdaşlıq məsələləri müzakirə edilib
Türk Mədəniyyəti və İrsi Fondunun prezidenti professor Aktotı Raimkulova Azərbaycan Milli Elmlər Akademiyasının (AMEA) Folklor İnstitutunun direktoru dosent Hikmət Quliyevlə görüşüb.
Görüşdə Aktotı Raimkulova rəhbərlik etdiyi qurumun Türk dünyasının mədəni dəyərlərinin qorunması, bərpası və təbliği istiqamətində həyata keçirdiyi beynəlxalq layihələrdən və görülən işlərdən danışıb. Qeyd edib ki, Türk Mədəniyyəti və İrsi Fondu ilə AMEA arasında geniş əməkdaşlıq əlaqələri mövcuddur və mədəni dəyərlərin elmi baxımdan araşdırılmasında akademiyanın böyük imkanları var.
Sonra Folklor İnstitutu ilə Türk Mədəniyyəti və İrsi Fondunun birgə əməkdaşlığı çərçivəsində türk xalqları folklorunun müxtəlif aspektlərinin öyrənilməsi və təbliği istiqamətində görüləcək işlər barədə söhbət açılıb. Bu istiqamətdə 2025-ci ildə Folklor İnstitutu ilə birgə həyata keçiriləcək bir sıra elmi layihələr haqqında müzakirə aparılıb.
Hikmət Quliyev bildirib ki, ölkəmizdə həyata keçirilən dövlət siyasətinə müvafiq olaraq, son illər AMEA-da aparılan islahatların mühüm istiqamətlərindən birini türk xalqları ilə elmi, mədəni-mənəvi əlaqələrin genişləndirilməsi və ortaq dəyərlərin birgə araşdırılması təşkil edir. O vurğulayıb ki, bu istiqamətdə AMEA-da görülən işlər Folklor İnstitutunun üzərinə də mühüm vəzifələr qoyur.
Görüşdə türk xalqları folklorunun müxtəlif istiqamətləri üzrə elmi tədqiqatlar sahəsində qarşılıqlı əməkdaşlıq məsələləri barədə ətraflı söhbət aparılıb, müvafiq razılıq əldə edilib.
15:35 03.03.2025
Oxunuş sayı: 8995
