Latviyada Xocalı faciəsinin ildönümü ilə əlaqədar “Oğul” sənədli filmi nümayiş olunub
Azərbaycanın Latviyadakı səfirliyinin təşkilatçılığı, “LİBRAFF” Kitab Mağazalar Şəbəkəsi və TEAS Press Nəşriyyat Evinin dəstəyi ilə Riqada Xocalı soyqırımının 33-cü ildönümü ilə əlaqədar “Oğul” sənədli filminin nümayişi keçirilib.
Səfirlikdən bildiriblər ki, bununla bağlı keçirilən tədbirdə çıxış edən Azərbaycanın Latviyadakı səfiri Elnur Sultanov Ermənistanın ölkəmizə hərbi təcavüzü zamanı xalqımıza qarşı törədilmiş Xocalı soyqırımının qurbanlarının xatirəsinin dərin hüznlə yad edildiyini deyib. Diplomat Xocalı soyqırımı ilə bağlı ətraflı məlumat verərək, keçmiş SSRİ-nin 366-cı motoatıcı alayının dəstəyinə arxalanaraq Ermǝnistan silahlı qüvvǝlǝri tǝrǝfindǝn Xocalı şəhərinin dinc əhalisinə qarşı törədilən bu cinayətin xüsusi qəddarlığı ilə seçildiyinə diqqəti çəkib. O, faciənin beynəlxalq təşkilatlar, milli parlamentlər, o cümlədən Latviya Seymi tərəfindən pisləndiyini və soyqırımı aktı, insanlığa qarşı cinayət kimi tanındığını söyləyib.
Səfir 2008-ci ildə Heydər Əliyev Fondunun vitse-prezidenti Leyla Əliyevanın təşəbbüsü ilə başlanmış “Xocalıya ədalət!” beynəlxalq kampaniyasının Xocalı faciəsi ilə bağlı dünya ictimaiyyətinin məlumatlandırılmasında mühüm rol oynadığını vurğulayıb.
Xocalıda törədilmiş cinayətlərin Ermənistanın geniş yayılmış, sistemli etnik və dini düşmənçilik siyasətinin tərkib hissəsi olduğunu vurğulayan diplomat Azərbaycan xalqına qarşı çoxsaylı cinayətlərin törətmiş şəxslərin hazırda ədalət mühakiməsi qarşısında cavab verdiklərini bildirib.
Qeyd olunub ki, Azərbaycan 2020-ci ildə Vətən müharibəsi və 2023-cü ildə antiterror tədbirləri nəticəsində qanunsuz işğala son qoyaraq, öz suverenliyini və ərazi bütövlüyünü bərpa edib.
Sonra Birinci Qarabağ müharibəsi zamanı erməni işğalçılarına qarşı böyük şücaətlə döyüşmüş Azərbaycanın Milli Qəhrəmanı Natiq Qasımovdan bəhs edən “Oğul” filmi latış dilinə tərcümə ilə nümayiş olunub. Ekran əsərinin rejissoru Karan Sinqhindir.
Tədbirdə Latviya Seyminin deputatları, Xarici İşlər Nazirliyinin rəsmiləri, diplomatik missiyaların rəhbərləri, ictimai və dini dairələrin nümayəndələri, Latviyada yaşayan Azərbaycan icmasının üzvləri, eləcə də bu ölkədə təhsil alan azərbaycanlı tələbələr iştirak ediblər.
04:44 28.02.2025
Oxunuş sayı: 10623
