Adil Kərimli: Nazirliyin qarşısında duran ən vacib məsələlərdən biri musiqi, incəsənət məktəblərində təhsilin keyfiyyətinin yüksəldilməsidir
Son dövrlərdə mədəniyyət sahəsində ciddi islahatlar həyata keçirilir. Prezidentin mədəniyyət sahəsinin inkişafı ilə bağlı verdiyi tapşırıqlar, bu sahəyə ciddi dəstəyi və dayanıqlı inkişaf nəticəsində bir sıra kompleks tədbirlərin həyata keçirilməsi nəzərdə tutulub.
Bu sözləri jurnalistlərə açıqlamasında mədəniyyət naziri Adil Kərimli deyib.
O bildirib ki, nazirliyin qarşısında duran ən vacib məsələlərdən biri musiqi, incəsənət məktəblərində təhsilin keyfiyyətinin yüksəldilməsidir. Çünki incəsənət təhsilinin ən vacib ilkin pilləsi məhz həmin məktəblərdən başlayır. Ona görə də, bizim əsas prioritet istiqamətlərimizdən biri bu məktəblərdə təhsil verənlərin keyfiyyətinin artırılması və xüsusilə də onların peşəkar vərdişlərinin inkişaf etdirilməsi ilə bağlıdır.
"Dövlət tərəfindən təsdiq edilmiş təqaüd proqramları çərçivəsində Mədəniyyət Nazirliyi xətti ilə artıq iki il ərzində iyirmidən çox tələbənin xarici ölkələrdə müxtəlif ixtisaslar üzrə təhsil alması reallaşdırılıb. Düşünürük ki, sistemli həyata keçirilən kadr islahatları gələcəkdə bütövlükdə bu sahənin inkişafına ciddi töhfə verəcəkdir", - deyə nazir qeyd edib. (AZƏRTAC)
11:00 26.02.2025
Oxunuş sayı: 1048
