İnfantinonun FIFA prezidentliyi uğrunda rəqibi bəlli oldu – UEFA namizədini seçdi
Fransa Futbol Federasiyasının prezidenti Filip Diallo FIFA rəhbərliyi uğrunda keçiriləcək seçkilərdə UEFA-nın namizədi olacaq.
Crossmedia.az xəbər verir ki, bu barədə Avropa Futbol Assosiasiyaları İttifaqının (UEFA) mətbuat xidməti məlumat yayıb.
Bildirilib ki, UEFA İcraiyyə Komitəsində təmsil olunan milli futbol assosiasiyaları Filip Diallonun namizədliyini irəli sürməyi təklif edib və ona yekdilliklə dəstək verib.
Təşkilatın bəyanatında FIFA-nın idarəçiliyi ilə bağlı ciddi narahatlıqların olduğu, dünya futbolunda birlik və etimadın bərpasına ehtiyac duyulduğu vurğulanıb.
Diallo namizəd olmaq təklifini qəbul edib.
FIFA prezident seçkiləri 2027-ci il martın 18-də Mərakeşdə keçiriləcək konqresdə baş tutacaq. Təşkilatın 2016-cı ildən prezidenti olan Canni İnfantino da yenidən namizədliyini irəli sürəcək.
Qeyd edək ki, İnfantino 2026-cı il dünya çempionatından sonra turnirin kommersiya hüquqlarının bir hissəsinin kənar investorlara satılması planını açıqladıqdan sonra futbol ictimaiyyətinin tənqidi ilə üzləşib. Bu təşəbbüs 2030-cu il dünya çempionatının boykot edilməsi çağırışlarına da səbəb olub. FIFA sonradan layihədən imtina edib.
20:22 16.11.2026
Oxunuş sayı: 35