Putin, Tramp və Si Cinpinin görüşündə əsas mövzu bəlli oldu
Çin Ukrayna münaqişəsinin Rusiya, ABŞ və Çin liderlərinin qarşıdakı üçtərəfli görüşünün gündəliyinə daxil edilməsini istəmir.
Crossmedia.az xəbər verir ki, bu barədə “Reuters” agentliyi məlumat yayıb.
Məlumata görə, Rusiya tərəfi noyabrın 18-19-da Çinin Şençjen şəhərində keçiriləcək Asiya-Sakit Okean İqtisadi Əməkdaşlıq Təşkilatının (APEC) sammiti çərçivəsində baş tutması gözlənilən görüşdə Ukrayna münaqişəsinin başa çatdırılması şərtlərini müzakirə etməyi planlaşdırır.
Lakin Pekin hesab edir ki, bu məsələ birbaşa Moskva və Vaşinqton arasında həll edilməlidir. ABŞ Prezidenti Donald Trampın administrasiyası da oxşar mövqedədir. Bildirilib ki, üçtərəfli format Ukrayna məsələsinin müzakirəsi üçün uyğun hesab edilmir.
Görüşün əsas gündəliyi nüvə silahları olacaq.
“Reuters”in məlumatına görə, Vaşinqton görüşdə Rusiya və Çinin iştirakı ilə nüvə silahlarına nəzarət üzrə yeni sazişin müzakirəsinə diqqət yetirmək niyyətindədir.
Lakin Pekin bu təşəbbüsə də ehtiyatla yanaşır. Çin tərəfi nüvə arsenalının Rusiya və ABŞ ilə müqayisədə xeyli kiçik olduğunu əsas gətirərək üçtərəfli razılaşmada qeyri-bərabər vəziyyətə düşə biləcəyindən narahatdır.
Agentliyin məlumatına görə, Rusiya və ABŞ-nin hər birinin 5 mindən çox nüvə başlığı olduğu halda, Çinin arsenalında təxminən 500 nüvə başlığı var.
Bundan başqa, tərəflərin nüvə silahlarına nəzarət sistemlərində süni intellektdən istifadənin məhdudlaşdırılması məsələsini də müzakirə edə biləcəyi bildirilir. Təkliflərdən biri nüvə silahının tətbiqi ilə bağlı qərarların qəbulunda insan nəzarətinin qorunmasıdır.
Üç liderin görüşü ilə bağlı xəbərlər fonunda Ukrayna Prezidenti Volodimir Zelenski belə bir sammitin böyük dövlətlər arasında təsir dairələrinin yenidən bölüşdürülməsinə səbəb ola biləcəyindən narahatlığını ifadə edib.
O, 1945-ci ildə keçirilən Yalta konfransını xatırladaraq bildirib ki, Ukrayna yeni Yalta razılaşmasını istəmir.
Kremlin sözçüsü Dmitri Peskov isə üçtərəfli görüşün noyabrın 19-na planlaşdırıldığını təsdiqləyib. Onun sözlərinə görə, müzakirə mövzuları ilə bağlı tərəflər arasında təklif mübadiləsi aparılır.
Qeyd edək ki, qarşıdakı sammit Rusiya, ABŞ və Çin liderlərinin iştirakı ilə keçiriləcək ilk üçtərəfli görüş kimi təqdim olunur. Görüşün yekun gündəliyi isə hələ tam razılaşdırılmayıb.
19:32 15.11.2026
Oxunuş sayı: 159