Türkiyə və Qazaxıstan ticarət dövriyyəsini 15 milyard dollara çatdırmağı hədəfləyir
Türkiyə və Qazaxıstan arasında qarşılıqlı ticarət dövriyyəsinin 15 milyard dollara çatdırılması istiqamətində işlər davam etdirilir. Hədəfə nail olmaq üçün məhsul çeşidinin artırılması, bazarlara çıxış imkanlarının asanlaşdırılması və daha çox şirkətin ikitərəfli ticarətə cəlb edilməsi nəzərdə tutulur.
Crossmedia.az xəbər verir ki, bu barədə Türkiyə-Qazaxıstan İş Şurasının Xarici İqtisadi Əlaqələr Şurası (DEİK) üzrə rəhbəri Səlçuk Yücə bildirib.
Onun sözlərinə görə, 2025-ci ilin göstəricilərinə əsasən, iki ölkə arasında ticarət dövriyyəsi təxminən 10 milyard dollara çatıb. Əsas məqsəd əldə olunan artımı sabit və davamlı hala gətirərək 15 milyard dollarlıq hədəfə nail olmaqdır.
Səlçuk Yücə bildirib ki, sənaye istehsalı, mədənçilik, kənd təsərrüfatı və ərzaq emalı əməkdaşlığın prioritet istiqamətləri sırasındadır. Qazaxıstanın kənd təsərrüfatı potensialının müasir istehsal, emal və saxlama texnologiyaları ilə dəstəklənməsi Türkiyə şirkətləri üçün yeni imkanlar yaradır.
O, həmçinin səhiyyə, kimya, əczaçılıq, tibbi avadanlıq istehsalı, enerji, logistika və rəqəmsal texnologiyalar sahələrində əməkdaşlığın genişləndirilməsinin vacibliyini vurğulayıb. Xüsusilə süni intellekt və rəqəmsallaşma sahəsində birgə təşəbbüslərin regional miqyasda əhəmiyyətli nəticələr verə biləcəyini qeyd edib.
Şura rəhbəri Türkiyə şirkətlərinin Qazaxıstanda investisiya imkanlarına da diqqət çəkib. Onun sözlərinə görə, qarşıdakı dövrdə kənd təsərrüfatı məhsullarının emalı, səhiyyə, istehsal və qablaşdırma sənayesi, tikinti materialları, mədənçilik, dərman və qida əlavələrinin istehsalı, eləcə də logistika mərkəzləri sahələrində investisiyaların artması gözlənilir.
Yücə iki ölkə arasında ticarətin inkişafı üçün logistika xərclərinin azaldılması, çatdırılma müddətlərinin qısaldılması və gömrük prosedurlarının sadələşdirilməsinin də mühüm əhəmiyyət daşıdığını bildirib.
O, Çindən başlayaraq Qazaxıstan, Xəzər dənizi və Cənubi Qafqaz üzərindən Türkiyəyə uzanan Orta Dəhlizin ticarət yollarının şaxələndirilməsinə töhfə verdiyini vurğulayıb. Bununla yanaşı, dəhlizin səmərəliliyinin artırılması üçün liman, dəmir yolu və logistika mərkəzlərinə investisiyaların genişləndirilməsinin, gömrük əməliyyatlarının rəqəmsallaşdırılmasının vacibliyini qeyd edib.
Şura rəhbəri Türk Dövlətləri Təşkilatının da iqtisadi əməkdaşlığın dərinləşdirilməsi üçün mühüm platforma olduğunu bildirib. Onun fikrincə, üzv ölkələrin təbii resursları, istehsal imkanları və müxtəlif bazarlara çıxış potensialı bir-birini tamamlayır. Birgə sənaye layihələri və qarşılıqlı investisiyalar təşkilat daxilində iqtisadi inteqrasiyanı gücləndirə bilər.
Qeyd edək ki, Türkiyə və Qazaxıstan arasında 2025-ci ildə ticarət dövriyyəsi təxminən 10 milyard dollar təşkil edib. İki ölkə qarşılıqlı ticarətin həcmini 15 milyard dollara çatdırmağı qarşıya məqsəd qoyub.
14:41 01.11.2026
Oxunuş sayı: 96
