Daşkəsəndə azyaşlılara bayram sovqatı verilib
Ölkənin aparıcı dağ-mədən şirkəti olan “AzerGold” QSC Yeni il və Dünya Azərbaycanlılarının Həmrəyliyi Günü ərəfəsində daha bir xeyriyyə təşəbbüsünü həyata keçirib.
Crossmedia.az xəbər verir ki, Səhmdar Cəmiyyət və Daşkəsən Rayon İcra Hakimiyyətinin birgə təşkilatçılığı ilə Daşkəsən rayonunun bütün kənd və qəsəbələrini əhatə edən bayram aksiyası təşkil edilib.
Aksiya çərçivəsində, ilk növbədə, Vətən müharibəsi şəhidləri, müharibə əlili və aztəminatlı ailələrin azyaşlı övladlarına “AzerGold” QSC-nin təşəbbüsü ilə uşaqların dağ-mədən sahəsi üzrə müxtəlif peşələrə marağının artırılması məqsədilə nəşr edilmiş “Qızıl axtarışında” adlı nağıl kitabı, müxtəlif növ şirniyyat və oyuncaqlardan ibarət boğçalar Şaxta baba obrazı tərəfindən təqdim edilib. Məqsəd azyaşlıları bayram sovqatları ilə sevindirmək, onlara xoş əhvali-ruhiyyə bəxş etməkdir.
Qeyd edək ki, aksiya “AzerGold” QSC-nin sosial təsir və məsuliyyət üzrə siyasəti çərçivəsində həyata keçirilib. Səhmdar Cəmiyyətin əsas fəaliyyət zonası olan Gəncə-Daşkəsən iqtisadi rayonunda həyata keçirilən sosial təşəbbüslər çərçivəsində belə aksiyaların təşkili gələcəkdə də davam etdiriləcək.
06:40 31.12.2024
Oxunuş sayı: 4083
