Azərbaycan regionda ekoloji təhlükəsizlik və dayanıqlı inkişafa misilsiz töhfə verən nümunəvi modeldir - RƏY
Qlobal iqlim çağırışlarının getdikcə aktuallaşdığı bir dövrdə ətraf mühit məsələləri beynəlxalq gündəliyin əsas mövzularından birinə çevrilib. Bu kontekstdə Ümumdünya Ətraf Mühit Günü kimi platformalar ölkələrin ekoloji siyasətini və prioritetlərini nümayiş etdirməsi baxımından xüsusi əhəmiyyət daşıyır. Azərbaycanın bu sahədə artan fəallığı isə onun qlobal ekoloji təşəbbüslərdə daha aktiv tərəfdaş kimi çıxış etdiyini göstərir.
Milli Məclisin deputatı, Ana Vətən Partiyasının sədri Günay Ağamalı Crossmedia.az-a açıqlamasında vurğulayıb ki, Azərbaycanın bu il Ümumdünya Ətraf Mühit Gününə ev sahibliyi etməsi dövlətimizin həyata keçirdiyi məqsədyönlü siyasətin beynəlxalq səviyyədə qəbul olunmasının, ölkəmizin qlobal gündəmdə artan rolunun, ekoloji məsələlərdə tərəfdaş olmasının nəticəsidir: "Bu cür mötəbər tədbir ilk növbədə Azərbaycanın beynəlxalq nüfuzuna əlavə dəyər qatacaq, dünya ictimaiyyətinin diqqəti Bakıya yönələcək, ölkəmizin həyata keçirdiyi ekoloji təşəbbüslər daha geniş auditoriyaya təqdim olunacaqdır. Bütün bunlar siyasi və iqtisadi baxımdan yeni əməkdaşlıqlar üçün yol açır. Xarici investisiyaların cəlbi, yaşıl texnologiyaların ölkəyə gətirilməsi və beynəlxalq təşkilatlarla əlaqələrin daha da möhkəmləndirilməsi baxımından adıçəkilən platformanın rolu çox önəmlidir. Ətraf mühitin qorunması istiqamətində layihələrin icrası günümüzün tələbidir. İşğaldan azad olunmuş ərazilərdə “yaşıl enerji zonası” konsepsiyasının genişləndirilməsi, alternativ enerji mənbələrinin – günəş və külək stansiyalarının sayının artırılması, su ehtiyatlarının daha səmərəli idarə olunması kimi layihələrin sürətləndirilməsi gözləniləndir".
Deputatın fikrincə, böyük şəhərlərdə hava keyfiyyətinin yaxşılaşdırılması, tullantı sisteminin müasirləşdirilməsi, çeşidləmə və təkrar emal infrastrukturunun genişləndirilməsi prioritet istiqamətlərdəndir: "Tədbir çərçivəsində “yaşıl şəhər” modelinin tətbiqi, ictimai nəqliyyatda ekoloji təmiz texnologiyalara keçid, ağacəkmə kampaniyalarının genişləndirilməsi kimi addımların daha sistemli xarakter alması mümkündür. Ekoloji məsələlər cəmiyyətin ümumi məsuliyyətidir. Nəticə üçün maarifləndirmə işi gücləncirilməlidir. Məktəblərdə, ictimai mühitdə hər kəsin bu proseslərdə iştirak etməsi önəmlidir. Azərbaycan “yaşıl keçid”ə töhfə verən dövlətdir. Ölkəmizin ümumdünya Ətraf Mühit Gününə ev sahibliyi etməsi sözügedən siyasətin davamlı və ardıcıl olduğunu göstərir. Azərbaycan regionda ekoloji təhlükəsizlik və dayanıqlı inkişafa misilsiz töhfə verən nümunəvi modeldir".
Fatimə
19:19 28.04.2026
Oxunuş sayı: 47
