Hikmət Hacıyevin ermənilərin göz tikdiyi tarixi abidədəyə dair paylaşımı hansı mesajları verir?
Azərbaycanın qədim tarixinin öyrənilməsi və beynəlxalq elmi ictimaiyyətə təqdim olunması baxımından Azıx mağarası xüsusi əhəmiyyət daşıyan nadir arxeoloji abidələrdən biridir. Prezidentinin Administrasiyasının Xarici siyasət məsələləri şöbəsinin müdiri Hikmət Hacıyevin bu məkanla bağlı son paylaşımı mağaranın yalnız regional deyil, bütövlükdə Qafqaz və Avrasiya məkanında ən mühüm Paleolit dövrü insan məskənlərindən biri kimi rolunu bir daha gündəmə gətirdi.
Azıx mağarasında aparılan yeni arxeoloji tədqiqatlar və əldə olunan elmi nəticələr göstərir ki, Azərbaycan ərazisi insanlığın ilkin inkişaf mərhələlərinin öyrənilməsi baxımından mühüm coğrafi məkanlardan biridir. Bu kontekstdə sözügedən abidənin yenidən tədqiqi, Paleolit dövrü mədəniyyətinin regiondakı izlərinin daha dərindən araşdırılması və əldə olunan nəticələrin beynəlxalq elmi diskursa daxil edilməsi Azərbaycanın tarixi irsinin qlobal miqyasda tanıdılması üçün yeni imkanlar yaradır.
Mövzu ilə bağlı Crossmedia.az-a açıqlamasında tarixçi alim Boran Əziz arxeoloji qazıntıların dünyada ən qədim insan məskənlərindən birinin Azərbaycanda olduğunu göstərir: "İstər paleolit, istərsə də sonrakı mezolit, neolit, eniolit, son tunc və erkən dəmir dövrlərinə aid abidələr fasiləsiz olaraq torpağımızda qədim insanların yaşadığını təsdiqləyir. Bu baxımdan, insanlığın yaranmasının mərhələlərinin öyrənilməsi və təkamül tarixinin araşdırılması üçün Azərbaycan ərazisində tapılan maddi mədəniyyət abidələrinin böyük əhəmiyyəti vardır", – deyə o bildirib.
Tarixçi əlavə edib ki, otuz ildən artıq müddət ərzində ermənilər bu abidələri zəbt edərək həm dağıtmış, həm də tədqiqatlarına mane olmuş, bəzi abidələri isə saxtalaşdıraraq qədim erməni irsi kimi təqdim etməyə çalışmışdır: "Bu, tamamilə yanlışdır və Azərbaycan ərazisinin qədim mədəniyyətə malik olduğunu dəyişdirmir", Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyevin Azıx mağarası ilə bağlı paylaşımları və orada olmaları böyük əhəmiyyət kəsb edir. Bu tədbirlər Quruçay mədəniyyəti, Köndələnçay vadisindəki mağaralar və Azıx mağarasının yenidən diqqət mərkəzinə gəlməsinə, həmçinin Azərbaycanın qədim bir yurd və insan yaşayış məskəni olduğunu dünyaya göstərməyə imkan yaradıb".
Tarixçi vurğulayıb ki, Qarabağda, o cümlədən Azıx və Köndələnçay ərazilərində aparılacaq arxeoloji tədqiqatlar və tapılan maddi mədəniyyət nümunələrinin beynəlxalq ictimaiyyətə çatdırılması Azərbaycanın qədim mədəniyyət və sivilizasiyaya malik olduğunu bir daha təsdiqləyəcək:
"Bu proses ölkənin tarixi irsinin dünya miqyasında tanıdılması və elmi mövqeyinin gücləndirilməsi baxımından böyük əhəmiyyət daşıyır".
Nigar Yahyazadə
17:43 17.03.2026
Oxunuş sayı: 1280
