XXI əsrin tək qalib ölkəsi Azərbaycandır - Ekspert
Son illər Azərbaycanın müdafiə sənayesi sahəsində əldə etdiyi nailiyyətlər ölkənin hərbi təyinatlı məhsullar bazarında mövqeyini getdikcə möhkəmləndirir. Hazırda Azərbaycan təxminən 20-yə yaxın ölkəyə hərbi təyinatlı məhsullar ixrac edir ki, bu da yerli müdafiə sənayesinin inkişafı və istehsal imkanlarının genişlənməsi baxımından diqqət çəkən göstərici hesab olunur.
Mütəxəssislərin fikrincə, son illərdə müdafiə sənayesinə qoyulan investisiyalar, yeni texnologiyaların tətbiqi və beynəlxalq tərəfdaşlarla qurulan əməkdaşlıq Azərbaycanın bu sahədə potensialını əhəmiyyətli dərəcədə artırıb. Bəs mövcud rəqəmlər Azərbaycanın hərbi sənaye imkanları və ixrac potensialı haqqında nə deyir?
Mövzu ilə bağlı hərbi ekspert Ədalət Verdiyev Crossmedia.az-a açıqlama verib:
"Hazırda dünyada bir neçə irimiqyaslı müharibə və münaqişə davam edir. Kifayət qədər çox sayda ölkə silah-sursat ehtiyatlarının bir hissəsini bu müharibələrdə sərf edib. Belə olan halda, təbii ki, XXI əsrin tək qalib ölkəsi olan Azərbaycanın müdafiə sənayesi sahəsinə maraq getdikcə artır.
Eyni zamanda Azərbaycanın dünyanın aparıcı ölkələri, o cümlədən Türkiyə, ABŞ, Serbiya və İsraillə müdafiə sahəsində uğurlu əməkdaşlığı mövcuddur. Bu səbəbdən Azərbaycanın istehsal etdiyi hərbi məhsullara maraq da getdikcə artır.
Yaxın perspektivdə ölkəmizdə istehsal olunan silah-sursatın həcminin artacağı, eləcə də bu məhsulları alan ölkələrin sayında yüksəlişin müşahidə olunacağı gözlənilir".
Ayhan
15:45 14.03.2026
Oxunuş sayı: 47
