Türkiyəyə mühüm səfər: İki qardaş dövlət güclərini birləşdirir
Azərbaycan və Türkiyə arasında strateji müttəfiqlik münasibətləri fonunda müdafiə sənayesi sahəsində əməkdaşlığın genişləndirilməsi məsələsinin müzakirəsi iki qardaş ölkənin təhlükəsizlik gündəliyində prioritet istiqamətlərdən birinə çevrilib. Xüsusilə Türkiyənin son illərdə müdafiə texnologiyaları sahəsində əldə etdiyi nailiyyətlər və Azərbaycanın öz hərbi-sənaye potensialını gücləndirmək istəyi bu əməkdaşlığa yeni məzmun qazandırır. Mövcud tərəfdaşlıq fonunda sual yaranır: müdafiə sənayesinin daha hansı istiqamətlərində birgə fəaliyyətə ehtiyac var və bu əməkdaşlıq hansı sahələr üzrə daha da dərinləşdirilə bilər?
Mövzu ilə bağlı hərbi ekspert Üzeyir Cəfərov Crossmedia.az-a açıqlama verib: "Azərbaycanla Türkiyə arasında müdafiə sənayesi sahəsində əməkdaşlıq dərin tarixi köklərə malikdir. Qardaş Türkiyənin hərbi sənayesi son illərdə sürətlə inkişaf edərək regionda və dünyada güclü mövqe qazanıb. Azərbaycan da öz müdafiə və təhlükəsizlik imkanlarını möhkəmləndirmək, milli müdafiə sənayesini inkişaf etdirmək məqsədilə Türkiyənin zəngin təcrübəsindən geniş şəkildə istifadə edir. Bu çərçivədə hər iki ölkə arasında mütəmadi səfərlər və yüksək səviyyəli görüşlər keçirilir".
Ekspert qeyd edib ki, bu dəfə də Azərbaycan nümayəndə heyəti Ankarada bir sıra mühüm görüşlər keçirib: "Görüşlər çərçivəsində Türkiyənin Milli Müdafiə Naziri Yaşar Gülər ilə, eləcə də aidiyyəti qurumların rəhbərliyi ilə müzakirələr aparılıb. Əsas məqsəd qarşılıqlı təcrübə mübadiləsi, müasir çağırışlara cavab verən yeni layihələrin həyata keçirilməsi və perspektiv əməkdaşlıq istiqamətlərinin müəyyənləşdirilməsidir. Əməkdaşlıq yalnız Müdafiə Sənayesi Nazirlikləri ilə məhdudlaşmır. İki ölkə arasında ən müasir texnologiyaların və müdafiə sistemlərinin tətbiqi prioritet istiqamət kimi müəyyən olunub. Görüşlərdə müdafiə sənayesində elmi yeniliklərin tətbiqi, istehsal olunan silah və sursatların birgə və ya ayrı-ayrılıqda keçirilən təlimlərdə sınaqdan keçirilməsi məsələləri də müzakirə edilib. Bir sözlə, bu əməkdaşlıq hər iki ölkəyə mühüm fayda verir. Həm Türkiyə, həm də Azərbaycan üçün bu tərəfdaşlıq maddi və strateji dividendlər qazandırır. 2026-cı ildə də qarşılıqlı səfərlərin və görüşlərin intensiv xarakter alacağı gözlənilir. Tərəflər hər iki ölkənin potensialını birləşdirərək müasir təhdid və təhlükələrə cavab verə biləcək ən yeni müdafiə və təhlükəsizlik texnologiyalarının yaradılmasında maraqlıdırlar".
Ayhan
17:05 04.03.2026
Oxunuş sayı: 1444
