Vaşinqtonda diqqətləri üzərinə çəkən çıxış: İlham Əliyev Azərbaycanın qlobal iddiasını ortaya qoydu
Azərbaycanın beynəlxalq müstəvidə artan fəallığı növbəti dəfə yüksək səviyyəli platformada diqqət mərkəzinə gəlib. Azərbaycan Prezidenti İlham Əliyevin Sülh Şurası çərçivəsində Vaşinqtonda iştirakı ölkənin xarici siyasət prioritetlərinin qlobal miqyasda təqdimatı baxımından önəmli addım kimi qiymətləndirilir. Bu proses Azərbaycanın artıq təkcə regional deyil, beynəlxalq gündəmdə də təsir imkanlarını genişləndirdiyini göstərir. Rəsmi Bakı müxtəlif güc mərkəzləri ilə dialoqda balanslı və praqmatik mövqeyini qorumaqda israrlıdır.
Bu barədə Milli Məclisin deputatı Hikmət Babaoğlu Crossmedia.az-a açıqlama verib:
"Sülh Şurasının tədbirində Azərbaycan Prezidentinə olan diqqət və ABŞ prezidenti Donald Tramp tərəfindən İlham Əliyevə göstərilən səmimiyyət Prezidentimizin qalıcı və ədalətli sülh yaratma missiyasına dünya ictimaiyyətinə ABŞ prezidentinin hörməti kimi qiymətləndirilməlidir. Nəticə etibarilə Tramp da dünyada mövcud olan münaqişələrin sülh ilə başa çatması üçün xüsusi siyasət həyata keçirir. Elə Sülh Şurasının yaradılmasının fəlsəfəsi də bu məntiqə əsaslanır. Əgər biz qalıcı, ədalətli bir sülh nümunəsi axtarırıqsa o zaman mütləq Azərbaycanın əldə etdiyi sülhə baxmalıyıq. Ölkəmiz müharibəni sülh üçün apardı, həmçinin, münaqişəni sülh ilə bitirdi. Ona görə də biz Azərbaycanın yarada bildiyi xüsusi sülh modelindən danışa bilərik. Belə ki, bu modelin içərisində daxili komponentlər olaraq ədalət, beynəlxaq hüquq var. Aqressiya, güclü olarkən başqalarının haqqını tapdalamaq isə yoxdur".
Deputat bunun ən bariz nümunələrindən biri olaraq Sülh Şurasının toplantısında Azərbaycan və Ermənistan liderlərinin əl sıxışmasını qeyd edib: "Bu həm sülh mövzusuna verilən dəstək kimi qiymətləndirilməli, həm də sülhün hazırkı mərhələdə nə qədər vacib olmasını dünyaya təqdim olunmasıdır".
Milli Məclisin deputatı Aydın Hüseynov bu iştirakın Azərbaycan diplomatiyası üçün strateji əhəmiyyət daşıdığını vurğulayıb:
"Cənab Prezident İlham Əliyevin Vaşinqtonda keçirilən Sülh Şurasında iştirakı Azərbaycan diplomatiyası üçün mühüm və strateji əhəmiyyət daşıyan hadisədir. Bu iştirak təkcə bir tədbirdə çıxış etmək deyil, Azərbaycanın beynəlxalq gündəmdə artan rolunun və artan nüfuzunun göstəricisidir.
Vaşinqton kimi qlobal siyasi mərkəzdə Azərbaycanın mövqeyinin təqdim olunması ölkəmizin artıq regional çərçivəni aşaraq beynəlxalq səviyyədə fəal oyunçuya çevrildiyini göstərir. Azərbaycan bu platformada həm regionda sülh və sabitlik təşəbbüslərini, həm də öz milli maraqlarını açıq və aydın şəkildə ifadə etdi.
Bu iştirak eyni zamanda Azərbaycanın müstəqil, balanslı və praqmatik xarici siyasət kursunun davamı kimi qiymətləndirilə bilər. Ölkəmiz müxtəlif güc mərkəzləri ilə qarşılıqlı hörmətə əsaslanan münasibətlər qurur və beynəlxalq dialoqda konstruktiv mövqe nümayiş etdirir.
Vaşinqtondakı bu görüşlər Azərbaycan–ABŞ münasibətlərinin inkişafı baxımından da əhəmiyyətlidir. Siyasi dialoqun genişlənməsi, iqtisadi əməkdaşlıq imkanlarının artması və təhlükəsizlik sahəsində qarşılıqlı anlayışın möhkəmlənməsi yeni mərhələnin əsas istiqamətləri kimi çıxış edir".
A.Hüseynov, əlavə edib ki, ümumilikdə, Prezident İlham Əliyevin Sülh Şurasında iştirakı Azərbaycanın xarici diplomatiyasında növbəti ciddi addım kimi dəyərləndirilə bilər. Bu, ölkəmizin beynəlxalq nüfuzunun artdığını və qlobal sülh təşəbbüslərində söz sahibi olduğunu bir daha nümayiş etdirir.
Fatimə Məmmədova
11:00 21.02.2026
Oxunuş sayı: 1031
