Dilinin qorunması üçün olimpiadaların keçirilməsi faydalı ola bilərmi?
Azərbaycanda dilçi tədqiqatçılar və media nümayəndələri üçün olimpiadaların təşkil olunması təklif edilib. Təklifin məqsədi dil sahəsində araşdırmaları təşviq etmək və mediada dilin düzgün istifadəsini stimullaşdırmaqdır.
Bakı Dövlət Universitetinin professoru, Mətbuat Şurası Dil Komissiyasının üzvü Qulu Məhərrəmli bildirib ki, olimpiadalar həm tədqiqatçılar, həm də media üçün təşkil oluna bilər.Qaliblərə mükafatların verilməsi hər kəsi növbəti addımlara ruhlandıra bilər.
Təklif AMEA və Mətbuat Şurası tərəfindən dəstəklənib və mükafatlar 21 Fevral – Beynəlxalq Ana Dili Günündə təqdim olunacaq.
Məsələ ilə bağlı Azərbaycan Atatürk Mərkəzinin direktoru, akademik Nizami Cəfərov Crossmedia.az-la öz fikirlərini bölüşüb:
"Azərbaycan Respublikasının Prezidenti İlham Əliyevin məşhur çıxışlarından sonra dilçilərin üzərinə, şübhəsiz ki, çox mühüm və məsuliyyətli vəzifələr düşür. Dilçilər dilin mahiyyətini, onun inkişaf qanunlarını və Azərbaycan dilinin tarixi formalaşma mərhələlərini yaxşı bilən mütəxəssislərdir.
Buna görə də Azərbaycan dilinin inkişaf etdirilməsi, onun imkanlarının genişləndirilməsi və müasir dövrün tələblərinə uyğun şəkildə zənginləşdirilməsi istiqamətində onların elmi və praktik potensialından daha səmərəli istifadə olunmalıdır.
Dilçilərin mətbuatda daha fəal çıxış etməsi, Azərbaycan dilini gözləyən təhlükələr, dilin funksional imkanlarının artırılması üçün həyata keçirilə biləcək layihələr barədə ictimaiyyətə müntəzəm məlumat verməsi xüsusi əhəmiyyət daşıyır.
Bu, həm cəmiyyətin dil məsələlərinə həssaslığını artırar, həm də dil siyasətinin düzgün istiqamətdə formalaşmasına töhfə verər. Eyni zamanda, mətbuat və dilçilər arasında sıx əməkdaşlığın qurulması vacibdir.
Azərbaycanda öz tarixi vətənində yaşayan bəzi azərbaycanlıların ana dilində orta təhsil alma hüququndan məhrum olması kimi məsələlər də ilk növbədə ziyalıları və xüsusilə dilçiləri düşündürməlidir. Bu kimi problemlərin elmi və ictimai müstəvidə müzakirəsi milli dilin qorunması baxımından mühüm əhəmiyyət kəsb edir.
Gənclərin və yeniyetmələrin nitqində müşahidə olunan qüsurlar, dil normalarından uzaqlaşma halları da dilçilərin diqqət mərkəzində olmalıdır. Onlar bu istiqamətdə elmi rəy və təkliflərini ictimaiyyətlə bölüşərək, nitq mədəniyyətinin yüksəldilməsinə töhfə verə bilərlər. Eyni zamanda, mətbuatın dili də xüsusi diqqət tələb edir, çünki medianın dilində mövcud olan problemlər ümumi dil mühitinə birbaşa təsir göstərir.
Dil olimpiadalarının keçirilməsi və bu tip maarifləndirici tədbirlərin təşkili cəmiyyətə dilimizin taleyi ilə bağlı peşəkar mesajların çatdırılması baxımından faydalı ola bilər.
Bu cür təşəbbüslər həm Prezidentin dil siyasəti ilə bağlı fikirlərinin peşəkar səviyyədə izahı və şərhi, həm də mətbuatın və medianın dilinin gücləndirilməsi, onun daha səlis və təsirli olması istiqamətində mühüm nəticələr verə bilər".
Elmir Heydərli
11:07 20.02.2026
Oxunuş sayı: 591
