Dəyişikliklər gözlənilir: Bu vəzifədə olan şəxslər "kreslo"sunu itirə bilər
Azərbaycan Prezidenti İlham Əliyev son illərdə müxtəlif nazirlik və dövlət qurumları tərəfindən ayrı-ayrılıqda hazırlanmış rəqəmsal platforma və tətbiqlərlə bağlı mühüm mesaj verib. Dövlət başçısı bildirib ki, bu proses artıq koordinasiyalı şəkildə aparılmalı, paralel fəaliyyət göstərən sistemlər mərhələli şəkildə ləğv edilməli və bütün dövlət xidmətləri vahid mərkəz – “mygov” platforması üzərindən həyata keçirilməlidir. Onun sözlərinə görə, həm dövlət qurumları, həm də vətəndaşlar üçün aydın olmalıdır ki, rəqəmsal xidmətlərin təqdimatı vahid sistem üzərindən təşkil ediləcək.
Bu yanaşma rəqəmsal idarəetmədə parçalanmanın aradan qaldırılması, resursların daha səmərəli istifadəsi və vətəndaş üçün daha sadə, əlçatan xidmət modelinin formalaşdırılması məqsədi daşıyır. Prezidentin səsləndirdiyi bu mövqe dövlət xidmətlərinin mərkəzləşdirilməsi və rəqəmsal arxitekturanın vahid platforma üzərində qurulması istiqamətində yeni mərhələnin başlandığını göstərir.
Mövzu ilə bağlı Milli Məclisin deputatı Fazil Mustafa Crossmedia.az-a açıqlama verib:
"Əlbəttə, Prezident artıq bu idarəetmənin yeni modelinə keçidin bütün istiqamətlərini müəyyən edib və vahid istiqamət üzrə mərkəzləşdirilmiş qaydada bu idarəetmə mexanizminin işləməsi üçün ayrı-ayrı dövlət qurumları öz təşəbbüslərini ortaya qoymalı və bu istiqamətdə praktiki addımlar atmağa çalışmalıdırlar. Çünki bu yanaşma həm də vətəndaşların işinin asanlaşdırılması, xidmətlərin daha çevik və səmərəli təşkil olunması baxımından mühüm əhəmiyyət daşıyır. Ümid etmək olar ki, digər qurumlar da Prezidentin bu tövsiyələrinə ciddi şəkildə əməl edəcək və yeni idarəetmə modelinin tətbiqi istiqamətində ardıcıl fəaliyyət göstərəcəklər. Çünki bu proses artıq yalnız seçim deyil, zamanın diktə etdiyi zərurətdir. Prezidentin də vurğuladığı kimi, müasir çağırışlar fonunda bu tələblərlə uzlaşmaqdan başqa alternativ yol qalmır və idarəetmədə yenilənmə qaçılmazdır".
Ayhan
15:50 14.02.2026
Oxunuş sayı: 501
