Azərbaycanın İslam dünyasında mövqeyi güclənib - RƏY
Yaxın Şərqdə uzun illərdir davam edən münaqişənin sülh yolu ilə həlli beynəlxalq ictimaiyyətin əsas gündəm mövzularından biri olaraq qalır. Bu prosesdə ədalətə, beynəlxalq hüquqa və dialoqa əsaslanan mövqelər xüsusi əhəmiyyət daşıyır. Azərbaycan Respublikası da regionda sülhün və sabitliyin təmin olunmasına yönəlmiş təşəbbüsləri daim dəstəkləyən, konstruktiv və prinsipial xarici siyasət yürüdən dövlət kimi çıxış edir. Məhz bu kontekstdə Prezident İlham Əliyevin Ərəb Parlamentinin nümayəndə heyəti ilə görüşü Azərbaycanın Fələstin məsələsinə və ümumilikdə Yaxın Şərq sülh prosesinə münasibətini bir daha aydın şəkildə ortaya qoyur.
Azərbaycanla Ərəb dünyası arasında əlaqələrin inkişaf perspkrivləri barədə Crossmedia.az-a danışan Milli Məclisin deputatı Elnarə Akimova deyib ki, Prezidentin xarici siyasətdə müsəlman, o cümlədən ərəb ölkələri ilə əlaqələrin prioritet olduğunu vurğulaması Azərbaycanın son illərdə apardığı çoxşaxəli və balanslaşdırılmış diplomatiyanın mühüm istiqamətlərindən birini əks etdirir: "Azərbaycan həm İslam dünyasının bir parçası kimi mədəni və dini bağlara, həm də strateji, iqtisadi və siyasi maraqlara əsaslanaraq bu ölkələrlə münasibətləri sistemli şəkildə inkişaf etdirir. Azərbaycan 1991-ci ildə müstəqilliyini bərpa etdikdən sonra İslam Əməkdaşlıq Təşkilatına (İƏT) üzv olub və təşkilat çərçivəsində fəal iştirak edir. İƏT platformasında Ermənistan–Azərbaycan münaqişəsi ilə bağlı Azərbaycanın mövqeyini dəstəkləyən çoxsaylı qətnamələr qəbul edilib. Bu sənədlər Azərbaycanın ərazi bütövlüyünü tanıyıb və işğal faktını pisləyib. Bu siyasi dəstək xüsusilə 30 ilə yaxın davam edən münaqişə dövründə və 2020-ci il Vətən müharibəsindən sonra diplomatik müstəvidə əhəmiyyətli rol oynayıb".
O söyləyib ki, Ərəb ölkələri ilə ikitərəfli münasibətlər iqtisadi sahədə də genişlənir: "Azərbaycan Birləşmiş Ərəb Əmirlikləri, Səudiyyə Ərəbistanı, Qətər və Küveyt kimi ölkələrlə enerji, investisiya, turizm və tikinti sahələrində əməkdaşlıq edir. Xüsusilə BƏƏ şirkətləri Azərbaycanın bərpa olunan enerji sektoruna maraq göstərir. Masdar şirkətinin Azərbaycanda günəş və külək enerjisi layihələrində iştirakı bu əməkdaşlığın konkret nümunəsidir. Eyni zamanda, Səudiyyə Ərəbistanı və digər Körfəz ölkələrindən Azərbaycana investisiya axını müşahidə olunur. Azərbaycanın Ərəb ölkələri ilə münasibətlərində humanitar və mədəni əməkdaşlıq da mühüm yer tutur. Heydər Əliyev Fondu bir sıra ərəb ölkələrində təhsil və mədəni irs layihələrini dəstəkləyib, eyni zamanda Azərbaycanda İslam mədəni irsinin qorunması və təşviqi istiqamətində layihələr həyata keçirilib. Bakı 2009-cu ildə İslam mədəniyyətinin paytaxtı elan olunub, 2017-ci il isə Azərbaycanda “İslam Həmrəyliyi İli” kimi qeyd edilib və IV İslam Həmrəyliyi Oyunlarına ev sahibliyi edilib".
Parlamentarinin fikrincə, bu tədbirlər Azərbaycanın İslam dünyasında mövqeyini gücləndirib: "Siyasi müstəvidə Azərbaycan bir çox müsəlman ölkələri ilə qarşılıqlı hörmət və daxili işlərə qarışmamaq prinsiplərinə əsaslanan münasibətlər qurur. Azərbaycan həm İslam dünyası, həm də Qərb ölkələri ilə paralel əlaqələr saxlayaraq körpü rolunu oynamağa çalışır. Bu balanslaşdırılmış siyasət ölkənin beynəlxalq nüfuzunun artmasına şərait yaradıb. Azərbaycanın Avropaya qaz ixracı və nəqliyyat-logistika layihələrində iştirakı onun geosiyasi çəkisini artırır ki, bu da ərəb ölkələri üçün əməkdaşlıq baxımından əlavə maraq yaradır. Bu istiqamətdə əməkdaşlığın gələcəkdə də enerji, investisiya, humanitar və diplomatik sahələrdə daha da dərinləşəcəyi gözlənilir".
Elmir Heydərli
17:15 13.02.2026
Oxunuş sayı: 630
