ABŞ-Azərbaycan münasibətləri qadağalardan strateji tərəfdaşlığa necə çevrildi? - Deputat
Azərbaycan-ABŞ münasibətləri son illərdə yeni bir mərhələyə qədəm qoyub. Bu münasibətlər Cənubi Qafqazın geosiyasi və enerji təhlükəsizliyi arxitekturasında artıq mühüm faktora çevrilib. Xüsusilə, 2025-ci ildə baş verən proseslər və qarşılıqlı əlaqələr münasibətlərin strateji tərəfdaşlıq səviyyəsinə yüksəldiyini göstərir.
Bu kontekstdə uzun illər Azərbaycanla
münasibətlərdə siyasi maneə kimi qiymətləndirilən 907-ci düzəlişin
dayandırılması məsələsi yenidən gündəmə gəlib.
Crossmedia.az-a danışan Milli Məclisin deputatı Naqif Həmzəyev bildirib ki, 2025-ci il Azərbaycan-ABŞ münasibətləri üçün əsas dönüş nöqtəsi oldu:
“Azərbaycana qarşı haqsız olaraq tətbiq olunmuş qadağanın aradan qalxması və strateji tərəfdaşlığın qurulması ilə Azərbaycan regionda aparıcı enerji və tranzit mərkəzi kimi mövqeyini daha da möhkəmləndirir. 907-ci düzəlişin faktiki zərərsizləşdirilməsi də bu prosesin əsas nəticələrindəndir”.
Naqif Həmzəyev vurğulayıb
ki, 2025-ci ilin avqustunda ABŞ prezidenti Donald Tramp prezident İlham Əliyevlə
görüşdə 907-ci düzəlişi dayandırıb və bu addım tarixi siyasi qərar kimi qiymətləndirilib.
Deputat əlavə edib ki,
Vaşinqtona səfər çərçivəsində Strateji Tərəfdaşlıq Xartiyasının hazırlanması
üzrə Strateji İşçi Qrupunun yaradılması ikitərəfli əlaqələri sistemli əməkdaşlıq
mərhələsinə keçirib.
O bildirib ki, bu əməkdaşlıq
enerji, tranzit, təhlükəsizlik, müdafiə, rəqəmsal infrastruktur və süni
intellekt sahələrini də əhatə edir.
Deputatın sözlərinə görə,
Azərbaycanın yaşıl enerji təşəbbüsləri və regional sabitlikdə artan rolu Azərbaycan-ABŞ
münasibətlərinin daha da dərinləşməsinə şərait yaradır:
“2025-ci il Azərbaycan üçün strateji möhkəmlənmə
ilidir. Bu münasibətlər artıq keçmişin məhdudiyyətləri ilə deyil, qarşılıqlı
maraqlar və konkret əməkdaşlıq imkanları əsasında inkişaf edir”.
Mehriban Yariyeva
13:09 09.02.2026
Oxunuş sayı: 629
