ŞOK: Vətən müharibəsi qazisi Rusiya-Ukrayna müharibəsində həlak oldu
Qarabağ müharibəsi və son antiterror əməliyyatlarından sağ çıxmış azərbaycanlı hərbçilər arasında ağır maddi vəziyyət və ailə qayğıları səbəbi ilə Rusiya–Ukrayna müharibəsində döyüşməyə gedənlər də olub. Onlardan biri, Ramin Abdullayev, vətən uğrunda döyüşlərdən sağ çıxmasına baxmayaraq, Rusiya tərəfinin tərkibində gedən döyüşlərdə həlak olub.
Bəzi hərbçilər isə ailələrinin təminatı və övladlarının gələcəyi üçün uzaq döyüş bölgələrində iştirak edir, maddi imkanlar əldə etməyə çalışırlar. Döyüşçülərin bu yolu seçməsi, onların şəxsi və ailə həyatı üçün risk daşısa da, ailə məsuliyyətini qarşılayaraq yaxınlarına dəstək olmağa yönəlir.
Bu barədə Crossmedia.az-a danışan hərbi ekspert Emin Həsənli bu cür qəhrəman övladlarımızın gedib başqa ölkələrin müharibələrində iştirak etdiklərini təəssüflə qeyd edib:
"Dünya tarixində belə hadisələr çox olub, indi də mövcuddur. Hazırda Ukraynada kifayət qədər müxtəlif ölkələrdən gəlib, Ukrayna tərəfdən döyüşənlər var, eyni zamanda müxtəlif ölkələrdən Rusiya tərəfdən döyüşənlər də mövcuddur. Azərbaycan dövlətinin qanunvericiliyi buna imkan vermir. Həmin şəxslər dünyasını dəyişərsə, həlak olarsa və ya yaralanarsa, Azərbaycan dövləti tərəfindən onlara heç bir imtiyaz verilmir. Qanunvericiliyə əsasən, Azərbaycan dövlətinin ərazi bütövlüyünün, konstitusiya quruluşunun və ictimai təhlükəsizliyinin qorunması zamanı həlak olmuş, şəhid olmuş və ya yaralanmış şəxslərə imtiyazlar nəzərdə tutulur. Xarici müharibələrdə iştirak edən şəxslərə isə bu imtiyazlar şamil edilmir. Dünyanın heç bir ordusunda belə bir hal yoxdur".
Eksepertin sözlərinə görə, orduda travma almış şəxslərin müalicəsi üçün Azərbaycan dövləti dünyanın ən qabaqcıl ölkələrində bu prosesi həyata keçirir: "Eyni zamanda əlillərin reabilitasiyası üçün müasir mərkəzlər fəaliyyət göstərir. Orada dövlət tərəfindən çoxsaylı lazımi avadanlıqlar və şərait təmin olunur. Azərbaycanın Birinci vitse-prezidenti Mehriban Əliyevanın təşəbbüsü ilə bu proseslər ən müasir üsullarla təmin edilib və onların məşğulluğunun təmin olunması birbaşa diqqət mərkəzindədir. Ümumilikdə dövlət qurumlarında müharibə əlilləri və şəhid ailələrinin üzvləri işlə təmin ediliblər və bu proses davam edir. Eyni zamanda onlar Əmək və Əhalinin Sosial Müdafiəsi Nazirliyinin məşğulluq proqramlarına da cəlb olunurlar.
Həm Azərbaycanın paytaxtında, həm də bütün şəhər və rayonlarda müxtəlif istiqamətlər üzrə peşə hazırlığı təşkil olunur. Bu, ev təsərrüfatından kənd təsərrüfatına, arıçılıqdan dülgərlik və kompüter kurslarına qədər müxtəlif sahələri əhatə edir. Onların hər biri uyğun sahələr üzrə bu prosesə cəlb olunub və proses davam edir".
E.Həsənli hesab edir ki, gələcəkdə də bu məsələ davam etdiriləcək: "Dünyanın heç bir ölkəsində, hətta ABŞ kimi ölkələrdə belə, müharibə iştirakçılarının hamısının psixoloji reabilitasiyasını və sağlamlığını yüz faiz bərpa etmək mümkün deyil. Azərbaycan dövləti maksimum imkanlardan istifadə edərək bu şəxslərə qayğı göstərməyə, sağlamlıqlarını bərpa etməyə və onları cəmiyyətə inteqrasiya etməyə çalışır.
Baxırıq ki, ayrı-ayrı nazirliklərdə və dövlət qurumlarında bu kateqoriyadan olan insanlar işlə təmin olunublar. Onların istirahətinin və asudə vaxtının təşkili, müxtəlif ölkələrə səfərlərinin təşkil olunması da həyata keçirilir və bu işlər sistemli şəkildə davam etdirilir.
Yeni qurumlar da yaradılıb. YAŞAT Fondu bu sahə ilə məşğul olur, icra hakimiyyətlərində müharibə iştirakçıları və şəhid ailələri ilə bağlı şöbələr fəaliyyət göstərir. Ayrı-ayrı nazirliklərdə bu kateqoriya ilə iş daha da sürətləndirilir və hesab edirəm ki, gələcəkdə daha sistemli xarakter alacaq.
İdrak Fondu da bu kateqoriyadan olan insanlara xüsusi qayğı göstərir. Təbii ki, problemlər də var, heç bir yerdə hər şey yüz faiz ideal deyil. Müəyyən çətinliklər mövcuddur, lakin hesab edirəm ki, zamanla bu problemlər aradan qaldırılacaqdır".
Fatimə Məmmədova
12:17 07.02.2026
Oxunuş sayı: 1474
