ABŞ-nin vitse-prezidenti Ceyms Devid Vens regiona səfəri çərçivəsində Ermənistan və Azərbaycanla bir sıra strateji anlaşmaların imzalanması gözlənilir.
Crossmedia.az bu barədə xarici mediaya istinadən xəbər verir.
Ermənistanla razılaşmalar:
Məlumata görə, ABŞ və Ermənistan arasında süni intellekt, mikroçiplər və İT texnologiyalarının birgə istehsalı, satışı və paylaşımı üzrə təxminən 3 milyard dollarlıq anlaşma planlaşdırılır. Bu saziş Ermənistanın müstəqillik tarixində ən iri razılaşmalardan biri ola bilər.
Bundan əlavə, ABŞ və Ermənistan arasında nüvə enerjisi sahəsində də anlaşma gözlənilir. Ermənistan ikinci enerji blokunun inşasını ABŞ şirkətinə həvalə etməyə hazırlaşır, Metsamor AESin yenidənqurulmasının da ABŞ tərəfinə verilməsi planlaşdırılır. Qeyd olunur ki, Metsamor AES 2027-ci ilə qədər Rosatomun idarəsindədir, lakin yeni blok üzrə seçim Rusiyanın əvəzinə ABŞ-dən yana edilə bilər.
Azərbaycanla əməkdaşlıq:
Səfər çərçivəsində Azərbaycan–ABŞ arasında hərbi sahədə bir sıra anlaşmaların imzalanacağı gözlənilir. ABŞ-nin Azərbaycanın sərhəd təhlükəsizliyinə əlavə dəstək göstərəcəyi bildirilir. Eyni zamanda, Azərbaycanın ABŞ-dən pilotsuz su qayıqları, Xəzər dənizi üçün patrul gəmiləri və hücum katerləri ala biləcəyi qeyd olunur.
Mənbələr bildirir ki, Azərbaycan ilk dəfə olaraq ABŞ-dən qırıcılar üçün xüsusi pilot dəbilqələri əldə edə bilər; bu tip avadanlıqlar indiyədək əsasən Fransadan idxal olunurdu. Həmçinin Xəzər dənizi hövzəsində birgə əməkdaşlıq da daxil olmaqla, genişmiqyaslı hərbi tərəfdaşlıq paketinin gündəmdə olduğu vurğulanır.
Regional marşrutlar:
Məlumata görə, Vensin Sünik Zəngəzur bölgəsinə səfəri və TRİPP marşrutu ilə tanışlığı da planlaşdırılır.
Qeyd edək ki, bu məlumatlar əvvəl yayımlanmış xəbərə əlavə və yenilənmiş detallardır; razılaşmaların rəsmi təsdiqi səfərin yekunlarına əsasən açıqlanacaq.
