Rusiya ilə iqtisadi əməkdaşlıq davam edir, lakin... -Parlamentari
Müasir beynəlxalq münasibətlər sistemində regional əməkdaşlıq və qarşılıqlı iqtisadi inteqrasiya dövlətlərin dayanıqlı inkişafının əsas şərtlərindən biri kimi çıxış edir. Xüsusilə Avrasiya məkanında yerləşən ölkələr üçün nəqliyyat dəhlizlərinin qurulması, ticarət marşrutlarının şaxələndirilməsi və qarşılıqlı etimad mühitinin formalaşdırılması həm iqtisadi, həm də geosiyasi baxımdan strateji əhəmiyyət daşıyır. Bu kontekstdə Azərbaycanın son illərdə həyata keçirdiyi xarici siyasət kursu ölkəni regional bağlantı mərkəzinə çevirməyi hədəfləyən sistemli və uzunmüddətli strategiya üzərində qurulmuşdur.
Prezident İlham Əliyevin Davos Ümumdünya İqtisadi Forumunda səsləndirdiyi fikirlər Azərbaycanın regionda formalaşdırdığı yeni münasibətlər modelinin mahiyyətini aydın şəkildə ortaya qoyur. Dövlət başçısının vurğuladığı kimi, Ermənistan istisna olmaqla bütün qonşu ölkələrlə konstruktiv və işlək münasibətlərin qurulması, Türkiyə və Gürcüstanla strateji tərəfdaşlıq səviyyəsində əlaqələrin inkişafı, eyni zamanda ABŞ və digər qlobal aktorların iştirakı ilə yeni nəqliyyat dəhlizlərinin təşəkkül tapması Azərbaycanın artıq regional iqtisadi arxitekturanın əsas aktorlarından birinə çevrildiyini göstərir.
Beləliklə, səsləndirilən tezislər yalnız mövcud vəziyyətin təsviri deyil, eyni zamanda gələcək üçün nəzərdə tutulan genişmiqyaslı inteqrasiya modelinin konturlarını formalaşdıran strateji baxış kimi dəyərləndirilə bilər. Azərbaycanın regionda sülh, təhlükəsizlik və qarşılıqlı fayda prinsipləri üzərində qurduğu bu yanaşma Avrasiyanın böyük bir hissəsində uzunmüddətli sabitliyin təmin olunmasına yönəlmiş mühüm siyasi xəttin ifadəsidir.
Məsələ ilə bağlı Milli Məclisin deputatı Elşad Musayev Crossmedia.az-la öz fikirlərini bölüşüb: "Ölkə başçısının Davosda verdiyi müsahibədə Avropa Parlamenti və Avropa Şurası ilə bağlı səsləndirdiyi tənqidi fikirlər xüsusi diqqət çəkdi. Məlumdur ki, Avropa Məhkəməsi uzun müddətdir Azərbaycana qarşı qərəzli mövqe nümayiş etdirir. Ermənistanla münasibətlərdə isə müəyyən normallaşma prosesi müşahidə olunur. Hazırda hərbi qarşıdurma yoxdur, lakin erməni tərəfinin davamlı iddiaları da gündəmdən tam çıxmayıb. Buna baxmayaraq, Avropa qurumlarının, xüsusilə Avropa Parlamentinin mövqeyi daha çox subyektiv və siyasi xarakter daşıyır. Qonşu ölkələrlə münasibətlər kontekstində Azərbaycanın əsas tərəfdaşlarından biri Gürcüstandır və iki ölkə arasında əlaqələr stabil və müsbət məcrada inkişaf edir. Türkiyə isə Azərbaycanın qardaş dövləti və əsas strateji müttəfiqidir, ikitərəfli münasibətlər yüksək səviyyədədir".
O söyləyib ki, Ermənistanla əlaqələr son dövrlər normallaşma istiqamətində inkişaf etsə də, bu proses hələ tam formalaşmayıb və ehtiyatlı yanaşma tələb edir: "Rusiya ilə iqtisadi əməkdaşlıq davam edir, lakin siyasi münasibətlərdə müəyyən soyuqluq hiss olunur. İranla münasibətlərə gəldikdə isə, Azərbaycan regional proseslərdə neytral mövqe tutmuş, İran tərəfi ilə də qarşılıqlı hörmət prinsipləri əsasında münasibətlərin qorunmasına üstünlük vermişdir. Bu yanaşma Azərbaycanın balanslaşdırılmış və praqmatik xarici siyasət kursunun bariz nümunəsidir".
Elmir Heydərli
10:53 23.01.2026
Oxunuş sayı: 1592
