Avrasiya regionunun nəqliyyat sistemini və infrastrukturunu Azərbaycansız təsəvvür etmək mümkün deyil - DEPUTAT
Qloballaşan dünyada nəqliyyat-logistika şəbəkələri və regional bağlantı mexanizmləri dövlətlərin iqtisadi gücünü, siyasi təsir imkanlarını və geostrateji mövqelərini müəyyən edən əsas amillərdən birinə çevrilmişdir. Xüsusilə Avrasiya kimi geniş və mürəkkəb coğrafiyada yerləşən ölkələr üçün tranzit potensialının düzgün idarə olunması yalnız iqtisadi fayda deyil, eyni zamanda, uzunmüddətli sabitlik və təhlükəsizlik baxımından da həlledici rol oynayır. Bu kontekstdə Azərbaycan son illərdə həyata keçirdiyi sistemli siyasət nəticəsində Şərqlə Qərbi, Şimalla Cənubu birləşdirən mühüm nəqliyyat qovşağına çevrilmək istiqamətində ardıcıl addımlar atmışdır.
Prezident İlham Əliyevin Davos Ümumdünya İqtisadi Forumunda səsləndirdiyi fikirlər Azərbaycanın bu strateji xəttinin ideoloji və praktik əsaslarını aydın şəkildə ortaya qoyur. Dövlət başçısının çıxışında vurğulandığı kimi, Türkiyə və Gürcüstanla qurulan müttəfiqlik və tərəfdaşlıq münasibətləri, ABŞ-nin kurasiyası altında həyata keçirilən yeni regional layihələr, eləcə də Ermənistanla paralel şəkildə normallaşma prosesləri Azərbaycanın təkcə milli maraqlarını deyil, bütövlükdə Avrasiyanın nəqliyyat təhlükəsizliyini və iqtisadi inteqrasiyasını gücləndirən faktorlara çevrilmişdir.
Beləliklə, təqdim olunan tezislər Azərbaycanın regionda artıq passiv iştirakçı deyil, əksinə, bağlantı və əməkdaşlıq arxitekturasını formalaşdıran əsas aktorlardan biri kimi çıxış etdiyini göstərir. Bu proses uzunmüddətli münaqişələrin qarşıdurma mərhələsindən tərəfdaşlıq və qarşılıqlı fayda mərhələsinə keçə biləcəyinin real və praktik nümunəsi kimi də xüsusi əhəmiyyət daşıyır.
Bu barədə Milli Məclisin deputatı Ceyhun Məmmədov Crossmedia.az-la öz fikirlərini bölüşüb: "Əvvəlki dövrlərdə də cənab Prezident bu cür vacib açıqlamalar vermiş və məsələlərə dair mövqeyini bildirmişdi. Bu gün isə növbəti dəfə onun belə bir açıqlama verdiyini müşahidə etdik. Azərbaycan, həqiqətən də, Avropa-Avrasiya regionunun mühüm hissəsidir. Ölkəmiz həm Orta Dəhliz, həm “Bir Kəmər, Bir Yol”, həm də Şimal-Cənub layihələrində önəmli mövqeyə və rol sahibidir. Ümumiyyətlə, Avrasiya regionunun nəqliyyat sistemini və infrastrukturunu Azərbaycansız təsəvvür etmək mümkün deyil. Bu baxımdan, məsələnin xüsusi önəmi və əhəmiyyəti vardır".
Deputat, həmçinin son illər Azərbaycanın bu prosesə öz mühüm töhfələrini verdiyini qeyd edib: "Ölkəmiz əsas nəqliyyat infrastruktur layihələrini inkişaf etdirir və tamamlayır. Burada Zəngəzur Dəhlizi xüsusilə qeyd edilməlidir. Dəhliz açıldıqdan sonra bölgənin nəqliyyat infrastrukturu və imkanları daha da inkişaf edəcək, Azərbaycan isə həm Avrasiya, həm də regional ərazinin inkişafında müstəsna rol oynayacaq. Bu prosesə ölkəmiz birmənalı və ciddi töhfələr verir. Beləliklə, Azərbaycan qarşısına qoyduğu məqsəd və hədəflərə uğurla çatır və bu hədəflərin həyata keçirilməsi üçün ciddi işlər görür".
Elmir Heydərli
10:45 23.01.2026
Oxunuş sayı: 2296
