2026-cı ildə sülh prosesinin hüquqi zəmində də həllini tapması üçün ciddi perspektiv var - RƏY
Cənubi Qafqaz regionu uzun illər ərzində siyasi qarşıdurmalar, hərbi münaqişələr və etimadsızlıq mühiti ilə xarakterizə olunmuşdur. Xüsusilə Azərbaycan və Ermənistan arasında mövcud olmuş gərgin münasibətlər təkcə iki ölkənin deyil, bütövlükdə regionun inkişaf perspektivlərinə ciddi maneələr yaratmışdır. Lakin son dövrlərdə imzalanan siyasi sənədlər və əldə edilən razılaşmalar regionda yeni geosiyasi reallığın formalaşdığını göstərir. Bu sənədlərin artıq real nəticələr verməyə başlaması isə sülh prosesinin formal bəyanatlardan praktiki mərhələyə keçdiyini nümayiş etdirir.
Azərbaycan Prezidenti İlham Əliyevin Dünya İqtisadi Forumunun Davosda keçirilən illik toplantısında səsləndirdiyi fikirlər bu baxımdan xüsusi əhəmiyyət kəsb edir. Prezidentin çıxışında vurğuladığı kimi, tərəflər tarixdə ilk dəfə olaraq müstəqil dövlətlər kimi uzunmüddətli sülh şəraitində yaşamağa başlamış və bu vəziyyət artıq konkret əməkdaşlıq nümunələri ilə müşayiət olunur. Enerji resurslarının, strateji yüklərin və iqtisadi əhəmiyyətli məhsulların qarşılıqlı daşınması kimi faktlar regionda etimad mühitinin formalaşdığını və sülhün iqtisadi dividendlər yaratdığını sübut edir.
Beləliklə, hazırkı mərhələ yalnız siyasi barışıq deyil, eyni zamanda, sosial-iqtisadi inteqrasiyanın ilkin konturlarının meydana çıxması kimi qiymətləndirilə bilər. Bu proses həm Azərbaycan, həm Ermənistan, həm də bütövlükdə Cənubi Qafqaz üçün sabitlik, inkişaf və əməkdaşlıq imkanlarının genişlənməsi baxımından strateji əhəmiyyət daşıyır.
Məsələ ilə bağlı Milli Məclisin deputatı Bəhruz Məhərrəmov Crossmedia.az-la öz fikirlərini bölüşüb: "Vətən müharibəsi və antiterror tədbirlərində Azərbaycanın böyük Zəfərinin ardınca yaranan yeni reallıqda cənab İlham Əliyevin təşəbbüsləri əsasında formalaşan sülh prosesi Azərbaycan liderinin qətiyyəti və ölkəmizin Vaşinqtonda Ermənistanla sülh və dövlətlərarası münasibətlərin bərqərar edilməsinə dair Sazişin paraflanması ilə tam yeni bir mərhələyə qədəm qoyub. Sülh prosesinin sonrakı mərhələdə Azərbaycan ərazisindən Ermənistana gedən yüklərə tranzit məhdudiyyətinin aradan qaldırılması, sərhədlərin delimitasiya və demarkasiyası istiqamətində aidiyyəti hökumət komissiyalarının görüşlərinin intensivləşməsi, qarşılıqlı olaraq ritorikaların yumşalması, o cümlədən vətəndaş cəmiyyəti institutları arasında kommunikasiyaların intensivləşməsi kimi müsbət tendensiyalarla müşayiət olunması dövlət başçımızın Davosda ifadə etdiyi kimi, artıq Azərbaycan və Ermənistan arasında sülhün və əlaqələrin bərqərar olunması məsələsininin praktik mərhələyə qədəm qoyduğunu göstərməkdədir. Əlbəttə, xalqlararası etimad quruculuğu məsələsinə nail olmaq zaman alacaq, lakin siyasi iradənin ortaya qoyulması, o cümlədən hökumətlərarası məsələlər üzrə real addımların atılması etimad mühitinin qurulması istiqamətində bir sıra hallarda həlledici amil kimi çıxış etməkdədir. Bu isə 2026-cı ildə sülh prosesinin hüquqi zəmində də həllini tapması üçün ciddi perspektiv yaradır. Davosda Azərbaycan və Ermənistan liderlərinin panel müzakirələr zamanı ifadə etdiyi mövqe də əslində bu istiqamətdə müəyyən mənada siqnal hesab edilə bilər".
Elmir Heydərli
10:26 23.01.2026
Oxunuş sayı: 3473
