Azərbaycanla əməkdaşlıqda maraqlı tərəflərin sayı getdikcə artır - DEPUTAT
Azərbaycanın müasir siyasi tarixi uzun illər ərzində ərazi itkiləri, humanitar fəlakət və bir milyondan artıq məcburi köçkünün doğma yurdlarından didərgin düşməsi kimi ağır reallıqlarla müşayiət olunmuşdur. Buna baxmayaraq, dövlətin strateji xətti heç vaxt ümidsizlik üzərində qurulmamış, əksinə, milli iradə, siyasi qətiyyət və beynəlxalq hüquqa əsaslanan mövqe üzərində formalaşmışdır. Azərbaycan öz suverenliyini və ərazi bütövlüyünü bərpa etmək məqsədilə uzun müddət beynəlxalq mexanizmlərə, vasitəçilik təşəbbüslərinə və diplomatik səylərə üstünlük versə də, bu proseslərin real nəticə verməməsi yeni yanaşmaların zəruriliyini ortaya çıxarmışdır.
Prezident İlham Əliyevin Davosda keçirilən Ümumdünya İqtisadi Forumunda səsləndirdiyi fikirlər məhz bu tarixi mərhələnin məntiqi yekunu kimi qiymətləndirilə bilər. Dövlət başçısının çıxışında vurğuladığı kimi, beynəlxalq institutların qəbul etdiyi qətnamələrin icra edilməməsi, vasitəçilik mexanizmlərinin səmərəsizliyi və status-kvonun dəyişməz qalması Azərbaycanı öz taleyinin məsuliyyətini birbaşa üzərinə götürməyə sövq etmişdir. Nəticə etibarilə, ölkə 2023-cü ildən etibarən qısa zaman ərzində silahlı qarşıdurma mərhələsindən danışıqlar və sülh quruculuğu mərhələsinə keçərək regionda yeni siyasi reallığın əsasını qoymuşdur.
Bu baxımdan Prezidentin Davos panelində səsləndirdiyi tezislər təkcə keçmişin qiymətləndirilməsi deyil, eyni zamanda, gələcək üçün formalaşdırılan sülh konsepsiyasının ideoloji və strateji əsaslarını əks etdirən mühüm siyasi manifest kimi çıxış edir.
Məsələ ilə bağlı Milli Məclisin deputatı Azər Badamov Crossmedia.az-la öz fikirlərini bölüşüb: "Təəssüflər olsun ki, müasir dünya nizamı beynəlxalq hüququn norma və prinsipləri əsasında deyil, əsasən güc amili üzərindən formalaşır və bu istiqamətdə inkişaf edir. Məhz bu reallığı nəzərə alan cənab Prezident İlham Əliyev illər boyu Azərbaycan xalqının diqqətinə çatdırırdı ki, ölkəmiz hərbi, iqtisadi və siyasi baxımdan güclü olmalıdır. Bu məqsədlə dövlət başçısı bütün mövcud resursları səfərbər etdi və ən əsası, xalqı vahid məqsəd ətrafında birləşdirməyi bacardı. Dünya təcrübəsi göstərir ki, dövlətlərin və xalqların ən böyük dayaqlarından biri xalq–dövlət birliyidir. Bu baxımdan Azərbaycan bu gün nümunəvi ölkə kimi çıxış edir. Digər mühüm məqam ondan ibarətdir ki, cənab Prezident İlham Əliyev “Euronews” kanalına müsahibəsində xüsusi olaraq vurğulamışdır: Azərbaycan bütün addımlarını beynəlxalq hüququn norma və prinsiplərinə uyğun şəkildə atmışdır. Çünki qarşılaşacağımız təzyiqləri və təhdidləri əvvəlcədən çox yaxşı dərk edirdik. Dövlət başçısı eyni zamanda özünü hər bir sadə vətəndaşın yerinə qoymağı bacarırdı. O, yerli televiziya kanallarına müsahibələrində də qeyd edirdi ki, insanların gözündə ümidin itdiyini görürdü və bu onu dərindən narahat edirdi. Təbii ki, insanların illərlə doğma torpaqlarına, dədə-baba yurdlarına qayıda bilməməsi cəmiyyətdə dərin psixoloji sarsıntı yaratmışdı. Bu narahatlıq cənab Prezidentin gündəlik fəaliyyətində və həyat prinsipində açıq şəkildə öz əksini tapırdı. Belə ki, o, bütün siyasi fəaliyyətini Azərbaycanın ərazi bütövlüyünün və suverenliyinin təmin olunmasına həsr etmişdi. Azərbaycan xalqı və onun lideri işğalla heç vaxt barışmamış, bu barışmaz mövqeni dünya ictimaiyyətinə də ardıcıl şəkildə çatdırmışdır".
O bildirib ki, dövlətlərin legitimliyinin ciddi şəkildə sual altına alındığı bir dövrdə Azərbaycan Prezidenti uzaqgörən və praqmatik xarici siyasət kursu nümayiş etdirir və bu kurs dünyanın aparıcı gücləri tərəfindən qəbul olunur: "Bu yanaşmaya hörmət var, Azərbaycanla əməkdaşlıqda maraqlı tərəflərin sayı getdikcə artır. Davos Ümumdünya İqtisadi Forumunun illik toplantısında “Avrasiyanın iqtisadi özünəməxsusluğunun müəyyənləşdirilməsi” mövzusunda paneldə cənab Prezidentin səsləndirdiyi “Torpaq itkilərinə və milyonlarla məcburi köçkünə baxmayaraq, ümidimizi itirmədik” fikri bu gün dünya ictimaiyyəti tərəfindən böyük rəğbətlə qarşılanır".
Deputat, həmçinin Azərbaycanın timsalında formalaşan ləyaqətli dövlət və qürurlu xalq modeli artıq bir çox ölkələr üçün strateji yol xəritəsi rolunu oynadığını bildirib: "Azərbaycan qətiyyət nümayiş etdirdi, döyüş meydanında göstərdiyi cəsarət, haqq uğrunda apardığı mübarizə və prinsipial mövqeyi beynəlxalq aləmdə nümunə kimi qəbul olunur".
Elmir Heydərli
10:21 23.01.2026
Oxunuş sayı: 5152
