Bəxtiyar Vahabzadənin 100 illiyinə həsr olunmuş konsert proqramı keçirilib
1 dekabr tarixində Beynəlxalq Muğam Mərkəzində Cahangir Cahangirov adına xorun ifasında Xalq şairi Bəxtiyar Vahabzadənin 100 illik yubileyinə həsr olunan "Səninlə dünyada bəxtiyaram mən" adlı ədəbi-musiqili proqram baş tutub. Xalq artisti Mehriban Zəkinin aparıcılıq etdiyi tədbir ədəbiyyat və musiqinin vəhdətinə əsaslanan unudulmaz sənət gecəsi kimi yadda qalıb.
Konsert proqramının dirijoru və bədii rəhbəri – respublikanın əməkdar müəllimi Təranə Yusifova olub. Konsertdə çıxış edən xor kollektivi müxtəlif musiqi janrlarını – muğam, estrada, klassik bəstəkar yaradıcılığı və caz elementlərini özündə birləşdirən geniş repertuar təqdim edib.
Proqram Emin Sabitoğlunun bəstəsi olan "Azərbaycan sənsən" əsərinin ifası ilə açılıb. Elmin İbrahimov və Zeynəb Nəcəfova solo ifaları ilə çıxış ediblər. Həmçinin Azərbaycan Milli Konservatoriyası nəzdində İncəsənət Gimnaziyasının Xoreoqrafiya şöbəsinin rəqs kollektivi səhnəyə xüsusi rəng qatıb.
Şairin xatirəsi gecə boyunca müxtəlif poetik nümunələrlə yad edilib. "Ana yurdum", "Bu qədər saldı məni həsrət", "Bu torpağa bağlıyam", "Ötən günlər", "Bəxtiyaram mən" kimi məşhur şeirlər səsləndirilib. Şairin poeziyası ilə bəstələnmiş mahnılar dinləyicilərə Azərbaycan ədəbiyyatının ruhunu və Bəxtiyar Vahabzadənin milli düşüncəsini çatdırıb.
Lalə Əhmədovanın "Sevdim, sevildim", Ramiz Mustafayevin "Qara gözlər", Xəyyam Mirzəzadənin "Yadındamı" və digər sevilən əsərlər gecənin bədii xəttini daha da zənginləşdirib. "Trio muğam" kompozisiyası isə səhnəyə ayrıca bir ruh gətirib. Aparıcının "Muğam bu xalqın vicdanıdır. Səssizdir, amma min illərin fəryadını daşıyır. Dinləyin muğamı, dinləyin Bəxtiyarı" sözləri tamaşaçıların alqışları ilə qarşılanıb.
Gecənin ən emosional məqamlarından biri Emin Sabitoğlunun musiqisi olan "Kəpənək" mahnısının ifası zamanı yaşanıb. Mahnı səslənərkən səhnəyə çıxan kiçik rəqqasə – İncəsənət Gimnaziyasının şagirdi Mehrinur Hacıyeva Bəxtiyar Vahabzadənin poeziyasındakı zəriflik və duyğusallığı rəqsi ilə canlandırıb. Bəxtiyar Vahabzadənin kəpənəyin varlığında həyat fəlsəfəsini görməsi haqqında aparıcının dediyi sözlər gecəyə xüsusi poetik çalar qatıb.
Konsert boyunca "Biri sənsən, biri mən", "Dodaqda gəz", "Gecələr bulaq başı", "Sən güldəndə gözəlsən", "Sənin vüqarın mənəm", "Bir millət, iki dövlət", "Ana torpaq" kimi əsərlər də səsləndirilib.
Musiqiçilər arasında əməkdar artist Nərgiz Əliyeva (piano), Səxavət Məmmədov (tar), Yusuf Rüstəmov (nağara), Röyal Heydərli (saz), Hüseyn Ələkbərli (balaban) və Mahir Quliyev (kamança) çıxış ediblər.
Tədbir boyunca Bəxtiyar Vahabzadənin yaradıcılığına xas olan vətən sevgisi, milli kimlik duyğusu, insanı düşündürən fəlsəfi fikirlər və poetik dərinlik musiqi və poeziyanın harmoniyasında tamaşaçıya təqdim olunub. Sənətsevərlər üçün bu gecə həm milli musiqimizin, həm də klassik Azərbaycan poeziyasının parlaq təntənəsinə çevrilib.
Nigar Yahyazadə
12:10 02.12.2025
Oxunuş sayı: 1430
