Partiya sədrlərindən təklif: Azərbaycanda narkotik açıq satılsın
“Ümid” partiyasının sədri İqbal Ağazadə bir müsahibəsində bildirib ki, Azərbaycanda qanunla hər kəsin 1 qrama qədər narkotik vasitə daşımasına və istifadə etməsinə icazə verilir. O qeyd edib ki, bu halda narkotik vasitələrin satışı üçün xüsusi yerlər müəyyən edilməli, narkotik asılılığı olan şəxslərə isə vəsiqə verilməlidir.
Azərbaycan Demokrat Partiyasının (ADP) sədri Sərdar Cəlaloğlu Crossmedia.az-a açıqlamasında bildirib ki, beynəlxalq təcrübəyə nəzər saldıqda görürük ki, Avropa ölkələrində və Amerikada narkotik asılılığı olan şəxslər qeydiyyata alınır:
“Onlara xüsusi vəsiqələr verilir. Hətta bəzi ölkələrdə, məsələn, Norveçdə dövlət narkotik asılılığı olan şəxsləri pulsuz narkotik vasitələrlə təmin edir. Məqsəd ondan ibarətdir ki, asılılığı olan şəxs aşağı keyfiyyətli və orqanizmə zərər vuran narkotik vasitələrdən istifadə etməsin, fiziki sağlamlığına zərər vurmasın və həmin maddələri əldə etmək üçün cinayət yoluna əl atmasın. Bu halların qarşısını almaq üçün Avropa ölkələrində fərqli yanaşma tətbiq edilir. Hətta bəzi ölkələrdə yüngül narkotik təsirə malik maddələrin xüsusi köşklərdə satılması təcrübəsi də mövcuddur. Qərbdə bu məsələlərə yanaşma bizdəkindən fərqlidir. Bizdə hər şey daha çox qadağa və cəza üzərində qurulur. Maraqlıdır ki, bu yanaşma tətbiq edildikdən sonra Qərbdə narkomaniyanın səviyyəsinin kəskin şəkildə azaldığı müşahidə olunub. İnsan təbiətində qadağan olunmuş şeyə qarşı xüsusi maraq var. Adəm peyğəmbərin də cənnətdə Allah tərəfindən qadağan edilən şeyə əl uzatması bunu göstərir. Yəni bu, insanın təbiətində olan xüsusiyyətdir. Qadağan olunan şeyə xüsusi maraq yaranır, amma həmin şey əlçatan olduqda insanın ona münasibəti fərqli ola bilər. Məsələn, Sovet dövründə alkoqolizmlə bağlı yanaşma əsasən qadağa və təqib üzərində qurulurdu. Alkoqoliklər xəstəxanalara yerləşdirilir, bəzən müxtəlif bəhanələrlə həbsxanalara salınırdılar. Alkoqolizm təqib olunur, alkoqoliklər dövlət himayəsindən, dövlət və cəmiyyət qayğısından kənarda qalırdılar. Çoxları küçə həyatı yaşamağa məcbur olurdu. Hətta maddi imkanları olmadığı üçün bəzi alkoqoliklər sərxoşedici, lakin orqanizm üçün təhlükəli maddələrdən istifadə edirdilər. Məsələn, meyitxanalarda meyitlərin saxlanıldığı spirtdən, ayaqqabı mazından, bəzi yapışdırıcılardan istifadə etmə halları olub. Hətta metil spirtindən istifadə edərək sərxoş olmağa cəhd göstərənlər də olub. Bu halların böyük əksəriyyəti ölümlə nəticələnib, bir çoxunda isə ağır psixoloji problemlər yaranıb”.
Partiya sədri əlavə edib ki, bu səbəbdən xarici ölkələrdə alkoqol asılılığı olan şəxslərlə bağlı da oxşar yanaşma tətbiq edilir: “Alkoqoliklərə müəyyən dozada gündəlik pulsuz spirt verilir ki, maddi imkanı olmayan şəxs tələbatını ödəmək üçün sağlamlığı üçün təhlükəli və ya cinayət yolu ilə əldə edilən spirtli içkilərdən istifadə etməsin. Biz bir məsələni nəzərə almalıyıq: hər hansı qadağa tətbiq edilərkən həmin qadağanın hansı fəsadlara səbəb ola biləcəyi də nəzərə alınmalıdır. Azərbaycanda məhdudiyyətlər tətbiq edilərkən çox vaxt onların mənfi nəticələri nəzərə alınmır. İlkin və qısamüddətli nəticələr nəzərə alınır, lakin uzunmüddətli nəticələr diqqətdən kənarda qalır. Bu baxımdan, Qərb ölkələrinin narkotik asılılığı olan şəxslərə narkotik vasitələr, alkoqol asılılığı olan şəxslərə isə müəyyən miqdarda spirt verməsinin məqsədi cəmiyyəti daha ağır təhlükələrdən və neqativ hallardan qorumaqdır. Eyni zamanda, bu yanaşma həmin şəxslərin fiziki sağlamlığının və həyatının qorunmasına xidmət edir”.
S.Cəlaloğlu əlavə edib ki, əgər Azərbaycanda 1 qrama qədər narkotik vasitənin istifadəsinə qanunla icazə verilirsə, xüsusi mərkəzlərin yaradılması məqsədəuyğun ola bilər: “Əgər belə bir qanun varsa, İqbal Ağazadənin təklifi olduqca ağlabatan və rasionaldır. Bir halda ki, dövlət bunu qadağan etmir, əgər 1 qrama qədər istifadəyə icazə verilirsə, hökumət həmin narkotik maddələrin dövlət hesabına təqdim olunmasını təşkil etməlidir ki, narkotik asılılığı olan şəxslər ailələrinə və ətrafdakı insanlara zərər vurmasınlar. Çünki narkotik maddə əldə etmək üçün oğurluq edən, adam öldürən, hücum edərək aptekləri yaran şəxslər olur. Asılılıqdan əziyyət çəkən bəzi şəxslər narkotik maddə əldə etmək üçün müxtəlif cinayət əməllərinə əl ata bilirlər. Bu baxımdan, belə mərkəzlərin yaradılması, vəsiqə əsasında hökumətin icazə verdiyi dozada narkotik maddələrin pulsuz təqdim edilməsi bir çox ailə və şəxsi faciələrin qarşısının alınması üçün düzgün yanaşma ola bilər. Bu, eyni zamanda, beynəlxalq təcrübəyə də uyğun olardı. Lakin burada mühüm bir fərq var: qanunda müəyyən miqdarda narkotik vasitəyə görə şəxsin məsuliyyətə cəlb edilməməsi həmin maddənin istifadəsinə icazə verilməsi demək deyil. Biri var ki, müəyyən miqdara görə cəza tətbiq edilmir, digəri isə həmin maddənin istifadəsinə qanunla icazə verilməsidir. Bunlar fərqli anlayışlardır. Əgər qanunvericilikdə həqiqətən də narkotik vasitənin istifadəsinə icazə verildiyi nəzərdə tutulursa, o zaman müvafiq mərkəzlərin və məntəqələrin yaradılması, narkotik asılılığı olan şəxslərin vəsiqə əsasında müəyyən dozada narkotik maddələrlə təmin edilməsi məqsədəuyğun və beynəlxalq təcrübəyə uyğun addım olar”.
Zərnigar Hüseynli
20:00 13.08.2026
Oxunuş sayı: 45
