Ermənistanda siyasi düşərgələr və Azərbaycanla bağlı yanaşmalar
Ermənistanda Azərbaycan vətəndaşları ilə bağlı sərt məhdudiyyətləri nəzərdə tutan yeni qanun layihələrinin hazırlanması regionda növbəti siyasi gərginlik müzakirələrini gündəmə gətirib.
Ermənistan mediasının yaydığı məlumata görə, Kremlin dəstəklədiyi bildirilən “Güclü Ermənistan” partiyası hakimiyyətə gələcəyi təqdirdə Azərbaycan vətəndaşlarının ölkədə daşınmaz əmlak əldə etməsinə qadağa qoymağı planlaşdırır.
Partiyanın nümayəndəsi Samvel Karapetyan bildirib ki, nəzərdə tutulan dəyişikliklər yalnız ev və torpaq sahələrinin alınmasını deyil, həmçinin hədiyyə formasında əmlak əldə edilməsini də məhdudlaşdıracaq. Sözügedən təşəbbüs Ermənistan daxilində və region ölkələrində siyasi dairələrin diqqətini çəkərək geniş müzakirələrə səbəb olub.
Məsələ ilə bağlı politoloq Əhəd Məmmədli Crossmedia.az-la öz fikirlərini bölüşüb:
"Seçki proseslərində tez-tez belə bir vəziyyət müşahidə olunur ki, seçki kampaniyası zamanı səsləndirilən bəzi vədlər sonradan, yəni seçkilərdən sonra tam şəkildə yerinə yetirilmir.
Bunun səbəbi odur ki, seçki dövründə deyilən sözlər daha çox ictimai dəstək qazanmağa yönəlir, lakin hakimiyyətə gələndən sonra dövlət idarəçiliyinin məsuliyyəti siyasətçiləri daha praqmatik və fərqli yanaşmağa vadar edir.
Lakin hazırkı şəraitdə bəzi tələblərin və vədlərin yerinə yetirilməsi mümkündür. Çünki bu prosesdə tərəflər hakimiyyətə gəldikləri halda müəyyən siyasətləri daha sərbəst şəkildə həyata keçirə biləcəklərini düşünürlər. Buna baxmayaraq, bəzən ictimai rəydə emosional yanaşmalar, xüsusilə də revanşist hisslər ön plana çıxarılır və bu, siyasi müzakirələrə təsir göstərir.
Digər tərəfdən, belə bir fikir formalaşır ki, hansı tərəf hakimiyyətə gələrsə, Azərbaycanla münasibətlər daha səmimi və konstruktiv şəkildə qurula bilər. Lakin bu məsələyə yalnız bir tərəfin prizmasından yanaşmaq düzgün deyil.
Ermənistan daxilindəki siyasi qüvvələrə birtərəfli şəkildə yanaşmaq və yalnız bir düşərgəni dəstəkləyib digərini tamamilə inkar etmək doğru yanaşma hesab olunmur.
Məsələn, Karapetyan və Koçaryan tərəfini hədəfə alaraq Paşinyanı tam dəstəkləmək və ya əksinə, Paşinyanı tam rədd etmək obyektiv mövqe sayılmır. Azərbaycan ictimaiyyətində bu məsələyə bəzən emosional yanaşma müşahidə olunur ki, bu da mənim fikrimcə, düzgün deyil.
Çünki Paşinyan tərəfi də seçkiqabağı dövrdə müəyyən sərt və emosional bəyanatlar verir, bəzən isə cəmiyyətə “sülh və müharibə arasında seçim” kimi təzyiq yaradan mesajlar ünvanlayır. Lakin ehtimal etmək olar ki, seçkilərdən sonra və ya hakimiyyət möhkəmləndikdən sonra siyasi ritorika müəyyən qədər dəyişə bilər.
Eyni şəkildə, əgər digər siyasi qüvvələr – Karapetyan, Koçaryan və onların təmsil etdiyi düşərgə – hakimiyyətə gələrsə, onların da mövqelərində reallıqlara uyğun dəyişikliklərin olması mümkündür. Çünki bütün tərəflər sonda siyasi reallıqları nəzərə almağa məcburdurlar.
Nəticə etibarilə, bu məsələdə bir tərəfə fokuslanaraq digərini tamamilə dəstəkləməmək və ya inkar etməmək daha doğru yanaşmadır.
Hər iki siyasi düşərgənin mövcudluğu və fəaliyyəti regional kontekstdə Azərbaycan üçün müxtəlif risklər və çağırışlar yarada bilər və bu reallıq obyektiv şəkildə qiymətləndirilməlidir".
Elmir Heydərli
16:25 22.05.2026
Oxunuş sayı: 56
