Avropa Parlamenti Bakı–İrəvan sülh prosesini zəhərləməməlidir – Fransalı deputat
Avropa Parlamentində Azərbaycanla bağlı keçirilən debat zamanı fransalı deputat Tyerri Mariani diqqətçəkən açıqlamalarla çıxış edib.
Crossmedia.az-ın məlumatına görə, o, Azərbaycan parlamentinin Avropa Parlamenti ilə əməkdaşlığı dayandırması barədə qərarı şərh edərək bildirib ki, Azərbaycan Prezidenti İlham Əliyev və Ermənistanın Baş naziri Nikol Paşinyan arasında aparılan sülh danışıqları region üçün tarixi fürsət yaradır.
Mariani çıxışında bildirib ki, Qarabağ ərazilərinin geri qaytarılmasından sonra Azərbaycan ordusunun sərhəd bölgələrində mövqeyini saxlaması mühüm məqamdır və bu proseslər hazırkı geosiyasi vəziyyətin tərkib hissəsidir.
Deputat, həmçinin Qafqazda sülhün mümkünlüyünü vurğulayaraq bunu 1963-cü ildə Fransa və Almaniya arasında imzalanan barışıq prosesinə bənzədib.
Onun sözlərinə görə, hazırda regionda sülh istiqamətində real danışıqlar gedir, lakin Avropa Parlamentinin qəbul etdiyi bəzi qətnamələr bu prosesi gərginləşdirə bilər.
Mariani əlavə edib ki, Azərbaycan Avropa Parlamenti ilə konstruktiv münasibətlərin tərəfdarı olsa da, son addımlar etimad mühitinə mənfi təsir göstərib.
Sonda deputat qeyd edib ki, Qafqazda sülh xarici müdaxilələrlə deyil, region ölkələri arasında birbaşa dialoqla təmin olunmalıdır və Avropa Parlamentinin rolu prosesi dəstəkləməkdən ibarət olmalıdır, onu zəhərləməkdən yox.
15:00 22.05.2026
Oxunuş sayı: 63
