Ərdoğan Trampla regional və qlobal məsələləri müzakirə edib
Türkiyə Prezidenti Rəcəb Tayyib Ərdoğan ABŞ Prezidenti Donald Trampla telefon danışığı aparıb. Söhbət zamanı ikitərəfli münasibətlər, eləcə də regional və qlobal proseslər müzakirə olunub.
Crossmedia.az xarici KİV-ə istinadən xəbər verir ki, Ərdoğan iki ölkə arasında əməkdaşlığın genişlənəcəyinə inandığını və Ankaranın münasibətlərə yeni təkan vermək üçün çalışacağını bildirib.
İranla bağlı gərginliyə toxunan Türkiyə Prezidenti Tehranla Vaşinqton arasındakı qarşıdurmanın sona çatmasının və problemlərin diplomatik yolla həll edilməsinin vacibliyini vurğulayıb. O, Türkiyənin sülh naminə səylərini davam etdirəcəyini qeyd edib.
Ərdoğan Rusiya-Ukrayna müharibəsi ilə bağlı artan diplomatik təşəbbüslərin müsbət nəticə verəcəyinə ümid etdiyini bildirib. Türkiyənin prosesə töhfə verməyə davam edəcəyini deyən Prezident Kiyev və Moskva ilə təmasların intensivləşdirilməsinin əhəmiyyətini vurğulayıb.
Türkiyə Prezidenti həmçinin Trampa Türk Dövlətləri Təşkilatının Zirvə toplantısına verdiyi dəstəyə görə təşəkkür edib.
21:45 07.11.2026
Oxunuş sayı: 34
