Gündəm

Zəfərdən quruculuğa aparan yol: xalqın dəmir iradəsi, ordunun rəşadəti və dövlətin qətiyyəti

8 Noyabr – Azərbaycan tarixinin şərəf və qürur salnaməsi

Bu gün təqvimdəki hər hansı bir gün deyil. Çünki elə günlər var ki, illər keçdikcə sevincini, qürurunu və həyəcanını yaşamaqdan yorulmursan. Çünki o günlərdə bir xalqın əsrlərlə yaşatdığı arzu gerçəyə, inamı qələbəyə, mübarizəsi isə tarixi Zəfərə çevrilir. 8 Noyabr Azərbaycan xalqı üçün məhz belə bir gündür. Bu tarix xalqımızın Vətən sevgisinin, milli birliyinin, sarsılmaz iradəsinin və qəhrəmanlıq ruhunun təntənəsidir. Bu gün bizim milli kimliyimizin özünü təsdiq etdiyi gündür. BU gün Milli Qeyrət Günüdür.

2026-cı il noyabrın 8-də Azərbaycan xalqı 44 günlük Vətən müharibəsində qazandığı möhtəşəm Qələbənin altıncı ildönümünü qeyd edir. Altı il əvvəl, 2020-ci il noyabrın 8-də Şuşanın azad edilməsi ilə Azərbaycan tarixinin ən şanlı səhifələrindən biri yazıldı. Bu, sadəcə bir şəhərin azad olunması deyildi. Bu, illərlə davam edən həsrətin sona yaxınlaşması, milli qürurun bərpası və xalqın öz tarixi torpaqlarına qayıdışına aparan yolun açılması idi.

Zəfər bir gündə qazanılmadı. Onun arxasında illərlə aparılan məqsədyönlü dövlət siyasəti, güclənən iqtisadiyyat, qurulan müasir ordu, beynəlxalq müstəvidə həyata keçirilən diplomatik fəaliyyət, xalqın sarsılmaz iradəsi və ən əsası, Vətən uğrunda canından keçməyə hazır olan igid oğullarımızın fədakarlığı dayanırdı. 8 Noyabr bu böyük yolun zirvəsi, Azərbaycan dövlətinin gücünün və xalqımızın yenilməzliyinin tarixi təsdiqi oldu.

Zəfərə aparan yol: illərin sınağından keçən qətiyyət və uzaqgörən siyasət

Azərbaycanın Zəfər tarixini və qazanılan Zəfərin mahiyyətini anlamaq üçün 1990-cı illərin əvvəllərinə qayıtmaq lazımdır. Torpaqlarımızın işğalı, yüz minlərlə soydaşımızın doğma yurdlarından didərgin düşməsi, şəhər və kəndlərimizin dağıdılması, tarixi-mədəni irsimizin məhv edilməsi xalqımızın yaddaşında sağalmaz yaraya çevrilmişdi. Uzun illər ərzində Qarabağ münaqişəsinin həlli istiqamətində aparılan danışıqlar gözlənilən nəticəni vermirdi. Beynəlxalq hüququn norma və prinsiplərinə, BMT Təhlükəsizlik Şurasının qətnamələrinə baxmayaraq, işğal faktı aradan qaldırılmırdı.

Belə bir mürəkkəb şəraitdə Azərbaycanın qarşısında duran ən mühüm vəzifə güclü dövlət qurmaq, iqtisadi müstəqilliyi təmin etmək, beynəlxalq mövqeləri möhkəmləndirmək və torpaqların azad olunmasına qadir ordu formalaşdırmaq idi. Və bu çətin proses 1 milyon qaçqınla birgə aparılmalı, onlar yerləşdirilməli, iqtisadi rifahı təmin olunmalı idi.

Bu istiqamətdə Ulu Öndər Heydər Əliyevin müəyyənləşdirdiyi dövlətçilik strategiyası mühüm tarixi əhəmiyyət daşıyırdı. Dövlətin möhkəmləndirilməsi, siyasi sabitliyin təmin edilməsi, iqtisadi inkişafın təməl prinsiplərinin formalaşdırılması və müstəqil Azərbaycanın beynəlxalq nüfuzunun yüksəldilməsi gələcək Zəfərin bünövrəsi idi.

Bu siyasi kurs Prezident, Müzəffər Ali Baş Komandan İlham Əliyev tərəfindən yeni dövrün çağırışlarına uyğun şəkildə inkişaf etdirildi. Prezident İlham Əliyevin uzaqgörən siyasətinin əsas istiqamətlərindən biri Qarabağ məsələsinin heç vaxt gündəmdən çıxarılmaması, Azərbaycanın milli maraqlarının bütün beynəlxalq platformalarda ardıcıl şəkildə müdafiə edilməsi idi. Dövlət başçısı hər zaman bəyan edirdi ki, Azərbaycan öz ərazi bütövlüyünü bərpa edəcək və işğal altında olan torpaqlarımız heç vaxt unudulmayacaq.

Bu sözlərin arxasında konkret fəaliyyət, ardıcıl strategiya və böyük dövlət iradəsi və ən əsası ata vəsiyyəti dayanırdı. Ölkənin iqtisadi potensialının artırılması, enerji strategiyasının uğurla həyata keçirilməsi, beynəlxalq tərəfdaşlıqların genişləndirilməsi, müdafiə sənayesinin inkişafı və ordunun ən müasir silahlarla təchiz olunması Zəfərə aparan yolun addımları idi.

Azərbaycan bir tərəfdən diplomatik müstəvidə öz haqlı mövqeyini müdafiə edir, digər tərəfdən isə hərbi qüdrətini artırırdı. Müasir silahlar alınır, hərbçilərin peşəkarlığı yüksəldilir, beynəlxalq hərbi əməkdaşlıq genişləndirilirdi. Türkiyə ilə strateji müttəfiqlik münasibətləri möhkəmləndirilirdi. Bütün bunlar təsadüfi qərarların deyil, illərlə düşünülmüş, gələcəyə hesablanmış dövlət siyasətinin nəticəsi idi.

Azərbaycan gözləyirdi, hazırlaşırdı, güclənirdi. Lakin bu gözləmə heç vaxt barışmaq, unutmaq və ya geri çəkilmək mənasına gəlmirdi. Bu, tarixi ədalətin bərpasına hazırlıq idi.

44 günə yazılan həsrətin cavabı

2020-ci il sentyabrın 27-də başlayan Vətən müharibəsi Azərbaycanın müasir tarixində yeni mərhələnin başlanğıcı oldu. Həmin gün cəbhəboyu ərazilərdə Azərbaycan Ordusunun mövqelərinin və yaşayış məntəqələrinin atəşə tutulmasına cavab olaraq əks-hücum əməliyyatı başlandı. Prezident, Ali Baş Komandan İlham Əliyevin rəhbərliyi ilə Azərbaycan Ordusu əks-hücum əməliyyatına keçərək işğal altındakı torpaqlarımızın azad edilməsi uğrunda mübarizəyə başladı.

44 gün davam edən müharibə dünya hərb tarixinə müasir döyüş strategiyasının, hərbi texnologiyaların və yüksək peşəkarlığın nümayişi kimi daxil oldu. Azərbaycan Ordusu döyüş meydanında böyük iradə, qəhrəmanlıq və peşəkarlıq nümayiş etdirdi. İşğalçı qüvvələrin illərlə qurduğu istehkamlar, müdafiə xətləri və keçilməz hesab edilən mövqelər bir-bir yarıldı.

Cəbrayılın, Füzulinin, Zəngilanın, Qubadlının azad edilməsi ilə Azərbaycan Ordusunun qələbə yürüşü davam etdi. Hər azad edilən kənd, hər geri alınan yüksəklik xalqın qəlbində yeni ümidlər alovlandırırdı. Həmin günlərdə Azərbaycan cəmiyyətində misilsiz həmrəylik hökm sürürdü. İllərdir xalqın içində hökm sürən intiqam hissi, milli birlik bir anda baş qaldırmışdı. Xalq ədalət tələb edirdi, torpaqlarını tələb edirdi. Cəbhədən gələn hər xəbər milyonlarla insanın diqqət mərkəzində idi. İnsanlar gecə-gündüz xəbərləri izləyir, əsgərlərin uğurlarına sevinir, şəhidlərimizin acısını birlikdə yaşayırdı. Azərbaycan xalqı bir yumruq kimi birləşmişdi.

Müharibə günlərində Prezident İlham Əliyevin xalqa müraciətləri, beynəlxalq media qurumlarına verdiyi müsahibələr Azərbaycanın haqlı mövqeyinin dünyaya çatdırılmasında mühüm rol oynadı. Dövlət başçısı həm döyüş meydanında, həm də informasiya cəbhəsində mübarizənin önündə idi. Bu mürəkkəb prosesdə xalqın, ordunun və Ali Baş Komandanın birliyi həlledici amilə çevrildi.

Şuşa – Zəfərin tacı, milli qürurun zirvəsi

Vətən müharibəsinin ən həlledici və tarixi məqamlarından biri, şübhəsiz ki, Şuşanın azad edilməsi oldu. Şuşa Azərbaycan üçün adi şəhər deyil. O, milli mədəniyyətimizin, musiqimizin, ədəbiyyatımızın, tariximizin və mənəvi yaddaşımızın ayrılmaz parçasıdır. Pənahəli xanın əsasını qoyduğu, Molla Pənah Vaqifin, Xurşidbanu Natəvanın, Üzeyir Hacıbəylinin, Bülbülün və bir çox görkəmli şəxsiyyətlərin adı ilə bağlı olan bu şəhər xalqımızın qəlbində xüsusi yer tutur.

Şuşanın işğalı xalqımız üçün böyük mənəvi ağrı idi. Buna görə də onun azad edilməsi yalnız hərbi deyil, həm də tarixi və mənəvi baxımdan müstəsna əhəmiyyət daşıyırdı. Noyabrın 8-də Azərbaycan xalqına Şuşanın azad edilməsi xəbəri çatdırıldı. Bu xəbər milyonlarla insanın gözlərində sevinc yaşına çevrildi. İllərlə qəlbimizdə yaşatdığımız arzu gerçəkləşmişdi. Şuşa azad edilmişdi!

Şuşa əməliyyatı Azərbaycan hərbçilərinin misilsiz şücaətinin nümunəsidir. Sıldırım qayalar, çətin relyef, əlverişsiz hava şəraiti və düşmənin möhkəmləndirilmiş mövqeləri qəhrəman döyüşçülərimizin iradəsini qıra bilmədi. Xüsusi təyinatlılarımızın dağlardan, meşələrdən keçərək şəhərə daxil olması və yaxın məsafəli döyüşlərdə göstərdiyi qəhrəmanlıq hərb tariximizin ən yaddaqalan səhifələrindən birinə çevrildi.

Şuşanın azad olunması müharibənin taleyini həll edən əsas hadisələrdən oldu. Noyabrın 10-da imzalanan üçtərəfli bəyanatla hərbi əməliyyatlar dayandırıldı. Ağdam, Kəlbəcər və Laçın rayonlarının Azərbaycana qaytarılması təmin edildi. Beləliklə, 44 günlük Vətən müharibəsi Azərbaycanın tarixi Qələbəsi ilə başa çatdı.

Bu müharibə nəticəsində Azərbaycan 300-dən çox yaşayış məntəqəsini, o cümlədən Cəbrayıl, Füzuli, Zəngilan, Qubadlı rayonlarını və Şuşa şəhərini döyüş yolu ilə azad etdi. Ağdam, Kəlbəcər və Laçın rayonları isə üçtərəfli bəyanata uyğun olaraq Azərbaycana qaytarıldı. 8 Noyabr tarixinin Zəfər Günü kimi müəyyənləşdirilməsi də məhz Şuşanın azad edilməsinin tarixi əhəmiyyətindən irəli gəlirdi.

Xalq – Ordu – Ali Baş Komandan: Zəfərin sarsılmaz üçlüyü

Azərbaycanın Qələbəsini şərtləndirən əsas amillərdən danışarkən xalq, ordu və Ali Baş Komandan birliyini xüsusi vurğulamaq lazımdır. Çünki müharibədə yalnız silahın gücü kifayət etmir. Qələbə üçün güclü siyasi iradə, milli həmrəylik, döyüş ruhu, peşəkarlıq və vahid məqsəd ətrafında birləşmək lazımdır. 44 günlük Vətən müharibəsi bu həqiqəti bütün dünyaya nümayiş etdirdi.

Prezident İlham Əliyevin uzaqgörən siyasəti, qətiyyətli rəhbərliyi və prinsipial mövqeyi müharibənin siyasi-strateji istiqamətini müəyyənləşdirdi. Ordumuz isə bu inamı döyüş meydanında qəhrəmanlıqla doğrultdu. Azərbaycan əsgəri öz gücünü, iradəsini, Vətənə sədaqətini göstərdi. Xalqımızın dəstəyi isə bu mübarizənin mənəvi dayağı idi. Müharibə dövründə könüllülərin orduya yazılması, arxa cəbhədə təşkil olunan dəstək aksiyaları, informasiya müharibəsində fəallıq, şəhid ailələrinə və qazilərə göstərilən diqqət milli həmrəyliyin təzahürünə çevrildi.

Bu birlik Azərbaycanın ən böyük gücü oldu. Zəfər yalnız bir siyasi qərarın və ya hərbi əməliyyatın nəticəsi deyildi. Zəfər illərlə formalaşan dövlətçilik iradəsinin, güclü ordunun, milli ruhun və xalqın sarsılmaz inamının vəhdəti idi.

Zəfərin ən böyük qiyməti: şəhidlərimizin qanı, qazilərimizin fədakarlığı

Zəfər Gününün sevincini yaşayarkən bu qələbənin hansı ağır bədəllə qazanıldığını heç vaxt unutmamalıyıq. Bu torpaqların azadlığı uğrunda minlərlə qəhrəman Azərbaycan oğlu canından keçdi. Şəhidlərimizin hər biri bir ailənin övladı, bir ananın ümidi, bir atanın fəxri, bir xalqın qəhrəmanıdır.

Onlar həyatlarının ən gözəl çağında Vətənin müdafiəsinə qalxdılar. Kimisi ailəsini, kimisi övladını, kimisi arzularını geridə qoyaraq döyüşə yollandı. Onların hər birinin yarımçıq qalan bir ömrü, gerçəkləşməyən arzuları vardı. Lakin onlar öz həyatlarını xalqın gələcəyi, Azərbaycanın bütövlüyü naminə fəda etdilər. Qazilərimizin göstərdiyi fədakarlıq da xüsusi ehtiramla anılmalıdır. Bədənlərində müharibənin izlərini daşıyan bu insanlar qəhrəmanlığın canlı nümunələridir.

Şəhidlərin xatirəsini yaşatmaq, qazilərə qayğı göstərmək, şəhid ailələrini diqqət mərkəzində saxlamaq yalnız dövlətin deyil, hər bir vətəndaşın mənəvi borcudur. Çünki Zəfər salnaməsinin hər sətrində bir şəhidin qanı, bir qazinin ağrısı, bir ananın göz yaşı var.

Zəfərdən sonra yeni mərhələ: azad edilmiş torpaqlarda Böyük Qayıdış və quruculuq

Zəfərdən sonra Azərbaycan qarşısında yeni vəzifə dayanırdı: işğaldan azad edilmiş əraziləri yenidən qurmaq, dağıdılmış şəhər və kəndlərimizi dirçəltmək, uzun illər doğma yurd həsrəti ilə yaşayan insanlarımızın qayıdışını təmin etmək. Bu, müharibədə qələbə qazanmaq qədər məsuliyyətli, mürəkkəb və böyük maliyyə tələb edən bir prosesdir.

İşğal dövründə Qarabağ və Şərqi Zəngəzurun şəhər və kəndləri ciddi dağıntılara məruz qalmış, yaşayış evləri, məktəblər, xəstəxanalar, tarixi abidələr, yollar və kommunikasiya xətləri məhv edilmişdi. Ərazilərin böyük hissəsi minalarla çirkləndirilmişdi. Azərbaycan dövləti bütün bu çətinliklərə baxmayaraq, azad edilmiş torpaqlarda genişmiqyaslı bərpa və quruculuq işlərinə başladı.

2022-ci il noyabrın 16-da Prezident İlham Əliyevin sərəncamı ilə təsdiq edilən «Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı» bu istiqamətdə görülən işlərin əsas yol xəritəsinə çevrildi. Proqramın əsas məqsədi ərazilərin təhlükəsizliyini təmin etmək, müasir infrastruktur yaratmaq, iqtisadi potensialı bərpa etmək, məşğulluq imkanlarını genişləndirmək və keçmiş məcburi köçkünlərin doğma torpaqlarına mərhələli şəkildə qayıdışını təmin etməkdir.

Bu gün Qarabağ və Şərqi Zəngəzurda həyata keçirilən quruculuq işləri öz miqyasına və əhatə dairəsinə görə Azərbaycanın müasir tarixində xüsusi yer tutur. Burada sıfırdan şəhərlər, kəndlər, yollar, körpülər, elektrik stansiyaları, su anbarları, məktəblər, xəstəxanalar, sosial obyektlər və istehsal müəssisələri inşa edilir.

Füzuli Beynəlxalq Hava Limanının 2021-ci ildə istifadəyə verilməsi, Zəngilan Beynəlxalq Hava Limanının 2022-ci ildə açılması, Laçın Beynəlxalq Hava Limanının isə 2025-ci ildə fəaliyyətə başlaması regionun nəqliyyat imkanlarının genişləndirilməsi baxımından mühüm əhəmiyyət daşıyır. Bu hava limanları yalnız nəqliyyat infrastrukturu deyil, həm də Qarabağın və Şərqi Zəngəzurun ölkənin digər bölgələri və dünya ilə əlaqələrinin möhkəmləndirilməsinin göstəricisidir.

Horadiz–Ağbənd dəmir yolu xətti, Füzuli–Şuşa avtomobil yolu (Zəfər yolu), Murovdağ tuneli və digər layihələr regionun iqtisadi inteqrasiyasına xidmət edir. Ağdamda, Füzulidə, Cəbrayılda, Zəngilanda və digər ərazilərdə müasir şəhərsalma prinsipləri əsasında yeni yaşayış məhəllələri salınır. Ağıllı şəhər və ağıllı kənd konsepsiyaları tətbiq olunur. Zəngilanın Ağalı kəndində həyata keçirilən «Ağıllı kənd» layihəsi bu baxımdan xüsusi əhəmiyyət daşıyır.

Şuşada aparılan bərpa işləri isə milli-mənəvi irsimizin dirçəldilməsi baxımından əvəzsizdir. Şəhərin tarixi simasının qorunması, mədəniyyət abidələrinin bərpası, məscidlərin və tarixi tikililərin yenidən qurulması, mədəni tədbirlərin təşkili Şuşanın əvvəlki şöhrətinin qaytarılmasına xidmət edir. Bir vaxtlar dağıdılmış və xarabalığa çevrilmiş şəhərdə bu gün həyat yenidən canlanır.

Rəqəmlərlə Böyük Qayıdış: dağıntılardan yeni həyat quruculuğuna

Qarabağ və Şərqi Zəngəzurda görülən işlərin miqyasını konkret rəqəmlər daha aydın ifadə edir. Prezident İlham Əliyevin 2026-cı il oktyabrın 14-də «Rebuild Garabagh» sərgisinin iştirakçılarına müraciətində açıqlanan məlumatlara və sonrakı rəsmi göstəricilərə əsasən:

• İşğaldan azad edilmiş ərazilərin bərpası və yenidən qurulması üçün dövlət büdcəsindən indiyədək 25,5 milyard manat vəsait ayrılıb (sonrakı rəsmi məlumatlarda bu rəqəm 26 milyard manata yaxınlaşır).

• 300 min hektardan çox ərazi mina və partlamamış hərbi sursatlardan təmizlənib.

• 40 mindən çox (noyabr 2026-cı ilin əvvəlinə 41 mindən artıq) keçmiş məcburi köçkün 47–48 yaşayış məntəqəsinə qayıdıb.

• Azad edilmiş ərazilərdə hazırda 100 minə yaxın insan yaşayır, təhsil alır və işləyir.

• 1500 kilometr avtomobil yolu inşa edilib.

• Füzuli, Zəngilan və Laçın beynəlxalq hava limanları istifadəyə verilib.

• Regionda ümumi gücü 307 meqavat olan 38 su elektrik stansiyası istifadəyə verilib.

• 13 elektrik yarımstansiyası, yeni su anbarları və bərpa olunan su təsərrüfatı obyektləri fəaliyyət göstərir.

Bu rəqəmlər sadəcə statistik göstəricilər deyil. Hər birinin arxasında böyük əmək, maliyyə resursları, mühəndislik təcrübəsi, dövlət proqramları və gələcəyə hesablanmış inkişaf strategiyası dayanır. Ən əsası, bu rəqəmlər doğma yurduna qayıdan insanların taleyində öz əksini tapır. İllərlə kirayələrdə, yataqxanalarda, müvəqqəti məskunlaşma yerlərində yaşayan ailələr indi öz evlərinin qapısını açır, övladları doğma torpaqda məktəbə gedir, insanlar öz kəndlərində işləmək və yaşamaq imkanı qazanırlar.

Qarabağın yaşıl enerji və iqtisadi inkişaf məkanına çevrilməsi

Azad edilmiş ərazilərdə həyata keçirilən quruculuq siyasətinin mühüm istiqamətlərindən biri də regionun iqtisadi potensialının üzə çıxarılmasıdır. Qarabağ və Şərqi Zəngəzur zəngin su, günəş və külək enerjisi ehtiyatlarına malikdir. Bu potensialdan səmərəli istifadə edilməsi məqsədilə regionda «yaşıl enerji zonası» konsepsiyası həyata keçirilir.

Kiçik su elektrik stansiyalarının tikintisi, enerji infrastrukturunun yenilənməsi, rəqəmsal idarəetmə sistemlərinin tətbiqi və alternativ enerji mənbələrinin inkişafı gələcəkdə regionun enerji təhlükəsizliyinə mühüm töhfə verəcək. Bununla yanaşı, kənd təsərrüfatının inkişafı, heyvandarlıq, üzümçülük, meyvəçilik, turizm, emal sənayesi və logistika sahələrində yeni imkanlar yaranır.

Ağdam Sənaye Parkı, «Araz Vadisi İqtisadi Zonası» Sənaye Parkı və digər iqtisadi layihələr regionun istehsal və məşğulluq potensialının artırılmasına xidmət edir. Deməli, Qarabağın gələcəyi yalnız yaşayış evlərinin tikilməsi ilə məhdudlaşmır. Məqsəd burada iqtisadi cəhətdən dayanıqlı, müasir texnologiyalara əsaslanan, yüksək həyat standartlarına malik yeni inkişaf məkanı formalaşdırmaqdır.

2023-cü il: Zəfərin məntiqi davamı – suverenliyin tam bərpası

Azərbaycanın Zəfər tarixinin mühüm mərhələlərindən biri də 2023-cü il sentyabrın 19-20-də həyata keçirilən lokal xarakterli antiterror tədbirləri oldu. 2020-ci ildə əldə edilmiş tarixi Qələbədən sonra Azərbaycanın suverenliyinin bütün ərazilərində tam bərpası istiqamətində mühüm addımlar atıldı. 2023-cü ilin sentyabrında həyata keçirilən tədbirlər nəticəsində Qarabağda qanunsuz silahlı birləşmələrin mövcudluğuna son qoyuldu və Azərbaycan dövlətinin konstitusiya quruluşu bərpa edildi.

Sentyabrın 20-si Azərbaycanın suverenliyinin tam bərpa olunduğu tarixi gün kimi yadda qaldı. Bu hadisə 2020-ci ilin Zəfərinin məntiqi davamı idi. Azərbaycan xalqı artıq yalnız torpaqlarının azad edilməsini deyil, dövlət suverenliyinin tam təmin olunmasını da gördü. Xankəndidə, Xocalıda, Xocavənddə, Ağdərədə və digər yaşayış məntəqələrində Azərbaycan bayrağının dalğalanması dövlətçilik tariximizin yeni mərhələsinin rəmzinə çevrildi.

Zəfərdən gələcəyə: bu qələbə bizə nə öyrətdi?

Altı il əvvəl Azərbaycan xalqı bir həqiqəti bütün dünyaya nümayiş etdirdi: milli birlik, güclü dövlətçilik, qətiyyətli rəhbərlik və peşəkar ordu qarşıya qoyulan ən böyük məqsədlərə çatmağın əsas şərtləridir.

Zəfər bizə göstərdi ki, xalq öz dövlətinə inananda, dövlət xalqının maraqlarına xidmət edəndə, ordu xalqın iradəsini və gücünü təmsil edəndə heç bir çətinlik qarşısında geri çəkilmək lazım deyil. Bu Qələbə həm də gənc nəsil üçün böyük məktəbdir. Bu gün məktəblərdə təhsil alan uşaqlarımız, universitetlərdə oxuyan gənclərimiz Zəfər tarixini yalnız dərsliklərdən öyrənməməli, onun mənəvi mahiyyətini də dərk etməlidirlər.

Onlar bilməlidirlər ki, azadlıq asanlıqla qazanılmır. Müstəqillik, dövlətçilik və ərazi bütövlüyü böyük fədakarlıq, məsuliyyət və milli həmrəylik tələb edir. Şəhidlərimizin bizə əmanət etdiyi bu Vətəni qorumaq, inkişaf etdirmək, daha güclü Azərbaycan qurmaq hər birimizin borcudur.

Bu gün Qarabağda ucalan yeni binalar, çəkilən yollar, tikilən məktəblər, açılan xəstəxanalar, istifadəyə verilən sənaye müəssisələri və doğma torpaqlarına qayıdan ailələr Zəfərin davam edən tarixidir. Bir vaxtlar işğal altında olan ərazilərdə bu gün tikinti kranları yüksəlir, yollar salınır, evlərdə işıqlar yanır, məktəb zəngləri çalınır. Vaxtilə doğma yurdunu yalnız xatirələrində yaşadan insanlar indi həmin torpaqlarda yeni həyat qururlar. Bu, tarix qarşısında böyük nailiyyətdir.

Zəfər Günümüz mübarək, Azərbaycan!

8 Noyabr yalnız keçmişdə qazandığımız qələbəni xatırlamaq günü deyil. Bu tarix həm də bu günümüzü dəyərləndirmək, gələcəyə inamla baxmaq və milli birliyimizin gücünü bir daha təsdiqləmək günüdür.

Altı il əvvəl Şuşada dalğalanan üçrəngli bayrağımız bu gün Qarabağın və Şərqi Zəngəzurun hər guşəsində ucalır. O bayraq şəhidlərimizin qanı, qazilərimizin qəhrəmanlığı, əsgər və zabitlərimizin fədakarlığı, xalqımızın sarsılmaz iradəsi və dövlətimizin qətiyyəti hesabına yüksəlib.

Bu gün Zəfər tariximizi vərəqləyərkən bir daha görürük ki, böyük qələbələr böyük hədəflərə inanan insanların əzmi ilə qazanılır. Prezident, Müzəffər Ali Baş Komandan İlham Əliyevin rəhbərliyi ilə həyata keçirilən məqsədyönlü siyasət, Azərbaycan Ordusunun misilsiz qəhrəmanlığı və xalqımızın sarsılmaz birliyi tariximizin ən şərəfli səhifələrindən birini yazdı.

İndi qarşımızda yeni vəzifələr var: azad edilmiş torpaqları daha da inkişaf etdirmək, Böyük Qayıdışı uğurla başa çatdırmaq, iqtisadi qüdrətimizi artırmaq, milli birliyimizi qorumaq və müstəqil Azərbaycanı gələcək nəsillərə daha güclü şəkildə ötürmək.

Zəfərdən altı il keçir. Bu altı il ərzində Azərbaycan həm tarix yazdı, həm də tarixini yenidən qurdu. Döyüş meydanında qazandığımız Qələbə bu gün quruculuq meydanında davam edir.

Bir zamanlar həsrətlə baxdığımız Qarabağ bu gün yenidən doğulur. Şuşanın küçələrində həyat qaynayır, Ağdamda yeni şəhər ucalır, Füzulidə, Zəngilanda, Cəbrayılda, Laçında yeni evlərdə işıqlar yanır. Bu torpaqlara qayıdan hər bir ailə Zəfərin canlı təcəssümüdür.