Gündəm

Hikmət Hacıyev: Bakı–Kabil əlaqələrində geniş əməkdaşlıq perspektivləri var

Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Bakı ilə Kabil arasında əməkdaşlığın inkişafı üçün geniş imkanların mövcud olduğunu bildirib.

Crossmedia.az xəbər verir ki, o, Bakıda keçirilən Ümumdünya Şəhər Forumu (WUF13) çərçivəsində jurnalistlərə açıqlamasında Azərbaycan ilə Əfqanıstan arasında uzun illərə dayanan tarixi, mədəni və ənənəvi əlaqələrin mövcud olduğunu vurğulayıb.

Hacıyev qeyd edib ki, Azərbaycanın Kabil şəhərindəki səfirliyi fəaliyyətini davam etdirir və bu, ikitərəfli münasibətlərin institusional əsasda qorunub saxlandığını göstərir.

Onun sözlərinə görə, ötən il Azərbaycanın baş nazirinin müavininin Kabilə səfəri zamanı iqtisadi-ticarət əməkdaşlığı və gələcək layihələr geniş şəkildə müzakirə olunub.

“Biz ölkələrimiz arasında əməkdaşlıq və xüsusilə də insanlararası təmaslar üçün böyük perspektivlər görürük”, – deyə Hacıyev bildirib.

O, həmçinin Azərbaycanda əfqan tələbələrin təhsil aldığını xatırladaraq, təhsil sahəsinin gələcək əməkdaşlıq üçün böyük potensiala malik olduğunu qeyd edib.

🖨 Çap et

15:05 22.05.2026

Oxunuş sayı: 50