Azərbaycan klubları Avropa yolunda - gözləntilər necədir?
Məlum olduğu kimi artıq futbol üzrə Azərbaycan çempionatının 2025-2026-cı il mövsümü yekunlaşmaq üzrədir. Sona bir tur qalmış liqada mənzərəyə baxdıqda, Azərbaycan futbolunda bu il ən diqqətçəkən məqam təkcə çempionluq yarışı deyil, eyni zamanda Avropa kuboklarına vəsiqə uğrunda genişlənən rəqabət olduğunu qeyd edə bilərik.
Azərbaycan Premyer Liqası çərçivəsində keçirilən oyunlar göstərdi ki, artıq yalnız ənənəvi favoritlər deyil, orta sıralarda yer alan komandalar da nəticəyə birbaşa təsir edə biləcək gücə malikdir. Bu isə liqanın ümumi balansının əvvəlki illərlə müqayisədə daha bərabər səviyyəyə gəldiyini göstərir.
Çempionluq mübarizəsində Sabah FK mövsüm boyu sabit performansı ilə ön plana çıxaraq tarixi nəticəyə imza atdı. Bununla yanaşı, Avropa biletləri uğrunda əsas rəqabət təkcə zirvə komandaları arasında deyil, həm də ikinci qrup klublar arasında getdi.
Bu kontekstdə Qarabağ FK və Neftçi PFK kimi klubların təcrübəsi həlledici rol oynadığı kimi, turnir cədvəlinin orta hissəsində qərarlaşan komandaların da nəticələrə təsiri böyük oldu.
Neftçinin mövsüm ortasında ən sadiq azarkeşini belə soruşsaq deyərdi ki, Avropa əlvida, lakin Yuri Vernidubun yetirmələri əsl futbol şousu göstərdi ki, bu da Neftçiyə olan inamı birə beş artırdı.
Xüsusilə, Turan Tovuz klubunun mövsüm ərzində göstərdiyi performans diqqətdən kənarda qalmır. Komanda uzun müddət Avropa zonası uğrunda mübarizənin içində qalaraq liqanın “sürpriz faktorlarından” birinə çevrildi.
Onların nəticələri bir çox turda turnir cədvəlində balansı dəyişdirən əsas amillərdən biri oldu və bu da göstərdi ki, artıq Azərbaycan Premyer Liqasında orta pillə komandaları da böyük hədəflərə təsir edə bilir.
Ümumilikdə isə mövsümün mənzərəsi belədir: çempionluq bir tərəfdən sabit və planlı qurulan layihələrin nəticəsi kimi ortaya çıxdı, digər tərəfdən isə Avropa vəsiqələri uğrunda mübarizə daha geniş və qeyri-sabit rəqabət mühiti yaratdı.
Bu reallıq Azərbaycan futbolunun yeni mərhələyə keçdiyini göstərir - artıq nəticəni yalnız adlar deyil, sistem, davamlılıq və mövsüm boyu sabitlik müəyyən edir.
Bəs maraqlıdır, Avropaya vəsiqə qazanan komandalarımız ilə bağlı hazırda gözləntilər necədir?
Məsələ ilə bağlı Crossmedia.az-a açıqlama verən futbol üzrə Azərbaycan yığmasının sabiq məşqçisi Şahin Diniyev klublarımızın Avropa arenalarda azarkeşlərimizi sevindirməyi bacaracağını bildirib:
"Hər bir komandanı ayrı-ayrılıqda təbrik edirəm. Düşünürəm ki, bu gün Avropaya vəsiqə qazanan dörd komandanın hər biri Azərbaycan futbolunu təmsil edir və cəmiyyət olaraq onların arxasında dayanmalıyıq.
Geridə qalan mövsüm kifayət qədər gərgin, rəqabətli və maraqlı keçdi. Belə çətin çempionatda Avropa kuboklarına vəsiqə qazanan klublar artıq öz güclərini və potensiallarını ortaya qoymuş oldular.
Zirə istisna olmaqla, hesab edirəm ki, digər komandalar mövsüm ərzində sərgilədikləri oyuna uyğun olaraq layiq olduqları mövqeləri tutdular.
İndidən konkret proqnoz vermək çətin olsa da, düşünürəm ki, klublarımızın hər biri ilk mərhələni uğurla keçmək potensialına malikdir. Sonrakı mərhələlərdə isə nəticələr həm püşkdən, həm klubun transfer və oyun siyasətindən, həm də meydandakı əzmdən asılı olacaq. Ümumilikdə isə inanıram ki, komandalarımız Avropa arenasında ölkəmizi layiqincə təmsil edəcəklər".
Elmir Heydərli
16:05 22.05.2026
Oxunuş sayı: 43
