Gündəm,Türk Dünyası

Birgə təlimlər orduların hazırlığını hansı səviyyəyə qaldırır?

Türkiyənin Konya şəhərində beynəlxalq hərbi əməkdaşlığın gücləndirilməsi istiqamətində növbəti mühüm addım atılıb.

Müxtəlif ölkələrdən olan hərbçilərin iştirakı ilə keçirilən “Anadolu Ankası - 2026” (“Anatolian Phoenix - 2026”) beynəlxalq axtarış-xilasetmə təliminə start verilib.

Təlim çərçivəsində iştirakçı qüvvələrin qarşılıqlı fəaliyyət qabiliyyətinin artırılması və real əməliyyat şəraitində koordinasiyanın təkmilləşdirilməsi əsas məqsədlərdən biridir.

Təlim zamanı qəza vəziyyətlərində ekipaj üzvlərinin axtarılması və xilas edilməsi, suda və quruda, eləcə də mürəkkəb relyef şəraitində əməliyyatların icrası, pilotların təhlükəsiz təxliyəsi və havadan dəstəyin təşkili kimi vacib tapşırıqlar icra olunur.

Eyni zamanda, iştirakçı ölkələrin hərbçiləri arasında təcrübə mübadiləsi aparılır, idarəetmə mexanizmləri və şəxsi heyətin peşəkar hazırlıq səviyyəsi daha da inkişaf etdirilir.

Keçirilən təlim həmçinin iki qardaş ölkə arasında olan əlaqələrlə bağlı hərbi ekspert Üzeyir Cəfərov Crossmedia.az-la öz fikirlərini bölüşüb:

"Anadolu Ankası 2026 təlimləri Türkiyədə bundan əvvəl keçirilmiş analoji hərbi təlimlərin məntiqi davamıdır. Hər il Azərbaycan hərbçiləri Türkiyənin Konya, İstanbul, Ankara, İzmir və digər şəhərlərində təşkil olunan təlimlərdə fəal iştirak edirlər. Bu təlimlər həm ikitərəfli, həm də bəzən üçtərəfli formatda keçirilir və Azərbaycan, Türkiyə, eləcə də Gürcüstan hərbçilərini əhatə edir.

Cari təlimlərdə Azərbaycan Hərbi Hava Qüvvələrinin şəxsi heyəti ilə yanaşı, hava hücumundan müdafiə bölmələri də iştirak edir. Ümumilikdə, bu cür təlimlərin əsas məqsədi hərbi birləşmələrin döyüş qabiliyyətinin artırılması, şəxsi heyətin praktiki bacarıqlarının təkmilləşdirilməsi və koordinasiyanın gücləndirilməsidir.

Son dövrlərdə regionda baş verən hadisələr fonunda bu təlimlərin əhəmiyyəti daha da artmışdır. 2024–2025-ci illərdə həyata keçirilmiş fəaliyyətlərin 2026-cı ildə daha da təkmilləşdirilməsi bu prosesin davamlı xarakter daşıdığını göstərir. Müntəzəm keçirilən bu təlimlər hərbçilərimizin peşəkarlıq səviyyəsinin yüksəldilməsində mühüm rol oynayır.

Baxmayaraq ki, Azərbaycan torpaqları artıq işğaldan azad olunub, buna baxmayaraq ordunun döyüş hazırlığının daim yüksək səviyyədə saxlanılması zəruridir. Şəxsi heyət istənilən anda qarşıya qoyulan tapşırıqları yerinə yetirmək üçün hazır olmalıdır.

Qeyd etmək lazımdır ki, Türkiyə Silahlı Qüvvələri NATO üzvü olan ölkənin ordusu kimi daha genişmiqyaslı təlimlərdə iştirak edir. Bu baxımdan, qardaş Türkiyə hərbçilərinin əldə etdiyi təcrübə və bacarıqların Azərbaycan hərbçiləri tərəfindən mənimsənilməsi xüsusi əhəmiyyət kəsb edir.

Şəxsi mövqeyim ondan ibarətdir ki, gələcəkdə bu təlimlərin miqyası daha da genişləndirilməlidir. Əgər hazırda təlimlərdə müəyyən sayda bölük və ya tabor iştirak edirsə, perspektivdə iştirakçı sayının artırılması məqsədəuyğun olardı. Şübhəsiz ki, bu, əlavə maliyyə və logistika xərcləri tələb edir. Lakin müasir dövrdə baş verən geosiyasi proseslər fonunda təhlükəsizlik məsələlərinə qənaət prizmasından yanaşmaq doğru olmaz.

Bu səbəbdən, gələcəkdə təlimlərə cəlb olunan hərbçilərin sayının artırılması və əməkdaşlığın daha da dərinləşdirilməsi vacib hesab olunur".

Elmir Heydərli

🖨 Çap et

14:30 09.04.2026

Oxunuş sayı: 1017