Türk dünyası üçün növbəti töhfə: Daşkənd universitetində Azərbaycan dili tədris olunacaq
Azərbaycan Mədəniyyət Mərkəzinin rəhbərliyi ilə Daşkənd İqtisadiyyat və Pedaqogika Universitetinin rəhbərliyi arasında görüş keçirilib. Görüşdə Azərbaycan Mədəniyyət Mərkəzinin direktoru Akif Marifli və Daşkənd İqtisadiyyat və Pedaqogika Universitetinin rektoru Şakarbay Janikulov iştirak ediblər.
Görüş zamanı elmi, təhsil və mədəniyyət sahələrində birgə layihələrin həyata keçirilməsi perspektivləri müzakirə olunub, əməkdaşlıq haqqında saziş imzalanıb. Saziş çərçivəsində ali təhsil müəssisəsi nəzdində Xalid Səid Xocayev adına Azərbaycanşünaslıq Tədris-Tədqiqat Mərkəzinin yaradılması nəzərdə tutulub.
Yeni mərkəz Azərbaycanın tarixi, mədəniyyəti, dili və ədəbiyyatının öyrənilməsi, eləcə də Azərbaycan ilə Özbəkistan arasında akademik və elmi əməkdaşlığın inkişafı üçün ixtisaslaşmış platforma kimi fəaliyyət göstərəcək. Burada birgə elmi tədqiqatların aparılması, akademik mübadilə proqramlarının həyata keçirilməsi, elmi-maarifləndirici tədbirlərin təşkili və gənclərin intellektual potensialının inkişafına yönəlmiş təşəbbüslərin dəstəklənməsi planlaşdırılır.
Mərkəz Azərbaycan və Özbəkistan arasında elmi və mədəni əlaqələrin formalaşmasında mühüm rol oynamış görkəmli alim, şair və tərcüməçi Xalid Səid Xocayevin adını daşıyacaq.
Sözügedən təşəbbüs Azərbaycan mədəniyyətinin beynəlxalq miqyasda təbliği ilə yanaşı, Azərbaycan–Özbəkistan elmi əlaqələrinin institusional səviyyədə inkişafına da yeni impuls verməyi hədəfləyir.
Məsələ ilə bağlı Milli Məclisin deputatı Ceyhun Məmmədov Crossmedia.az-la öz fikirlərini bölüşüb:
"Ümumilikdə, bu gün qarşıda duran ən mühüm vəzifələrdən biri türk dövlətləri ilə əlaqələrin daha da inkişaf etdirilməsidir. Bu əlaqələrin möhkəmləndirilməsi müxtəlif istiqamətlər üzrə həyata keçirilir. Həmin istiqamətlərdən biri də qarşılıqlı əməkdaşlığın genişləndirilməsi, davamlı və məqsədyönlü addımların atılmasıdır.
Bu baxımdan hesab edirəm ki, Daşkənd Universitetində Azərbaycan dili üzrə tədris mərkəzinin yaradılması türk dövlətləri arasında, xüsusilə də Azərbaycan ilə Özbəkistan arasında münasibətlərin inkişafına ciddi və müsbət töhfə verəcəkdir. Hazırda əsas məqsədimiz türk dövlətləri ilə əlaqələrin daha geniş və sistemli şəkildə inkişaf etdirilməsidir.
Şübhəsiz ki, bu əlaqələr siyasi, iqtisadi və digər sahələrdə mövcuddur və davamlı şəkildə genişlənir. Lakin ən mühüm əməkdaşlıq istiqamətlərindən biri elm, təhsil və tədris sahəsində əməkdaşlıqdır. Məhz bu sahədə qurulan əlaqələr uzunmüddətli və strateji xarakter daşıyır və gələcək nəsillər üçün möhkəm təməl yaradır".
Deputat, həmçinin bu səbəbdən, təhsil və elm sahəsində əməkdaşlığın Azərbaycanın uzunmüddətli inkişaf strategiyasında xüsusi yer tutduğunu və prioritet istiqamətlərdən biri hesab olunduğunu bildirib: "Bu məqamı daim diqqətdə saxlamalı, müvafiq addımlar atmalı və planlaşdırılmış işləri ardıcıl şəkildə həyata keçirməliyik. Hesab edirəm ki, Daşkənd Universitetində Azərbaycan dili tədris mərkəzinin yaradılması məhz bu prosesə növbəti mühüm töhfə kimi qiymətləndirilməlidir".
Elmir Heydərli
10:22 14.01.2026
Oxunuş sayı: 2172
