Xarici xəbərlər

Orban: Macarıstanı vetodan məhrum etməyə çalışan Brüssel məhkəmədə uduzacaq

Macarıstanın baş naziri Viktor Orban Avropa İttifaqının Macarıstanın veto hüququnu ləğv etməyə cəhd göstərəcəyi təqdirdə Budapeştin məhkəməyə müraciət edəcəyini və Brüsselin bu prosesdə uduzacağını bildirib. Crossmedia.az xəbər verir ki, Orban bu fikirləri Hetek portalına müsahibəsində səsləndirib.

“Brüsseldə indi etməyə çalışdıqları açıq-aşkar konstitusiya normalarının pozulmasıdır. Bu isə məhkəmə çəkişməsinə gətirib çıxaracaq. Biz məhkəməyə müraciət edəcəyik və onlar uduzacaqlar,” – deyə Orban Avropa İttifaqının Macarıstanın vetosunu ləğv etmək və Ukraynanın quruma qəbuluna maneəni aradan qaldırmaq planları ilə bağlı suala cavab verərkən bildirib.

Macarıstan baş naziri əlavə edib ki, hazırda Brüsseldə qarşıdan gələn aprel parlament seçkilərində hazırkı hökuməti devirmək və yerinə “Brüsselin layihəsi” olan, QHT-lər vasitəsilə “böyük pullarla dəstəklənən” müxalif qüvvələri hakimiyyətə gətirmək planları da qurulur. Bu qüvvələrin isə Ukraynanın Aİ-yə üzvlüyünü dəstəkləyəcəkləri gözlənilir.

Xatırladaq ki, bundan əvvəl KİV Avropa Şurasının sədri Antoniu Koştanın Ukraynanın Aİ-yə üzvlük danışıqlarını sürətləndirmək üçün səsvermə prosedurunu sadələşdirmək və Macarıstanın vetosunu neytrallaşdırmaq təşəbbüsü ilə çıxış etdiyini yazmışdı.