Avropa Komissiyası Ukraynanın üzvlüyünə dair yeni şərtlər irəli sürüb
Avropa Komissiyası Ukraynanın Aİ-yə üzvlüyü halında bazara çıxışına keçid məhdudiyyətləri təklif edib.
Crossmedia.az xəbər verir ki, “Ria novosti” Avropa İttifaqının genişlənməsinə hazırlıqla bağlı sənədə istinadən bu barədə məlumat yayıb.
Sənədə əsasən, Avropa Komissiyası Ukrayna da daxil olmaqla yeni üzv ölkələrin ittifaqa qoşulmasından sonra bəzi həssas sahələrdə məhdudiyyətlərin saxlanılması imkanını nəzərdən keçirir. Bu sahələrə işçi qüvvəsinin və xidmətlərin sərbəst hərəkəti, kənd təsərrüfatı və müəyyən məhsullar daxildir.
Təklifə görə, Aİ-yə üzvlük ölkənin bütün mövcud qaydalara dərhal və tam şəkildə tabe olması anlamına gəlməyəcək. Keçid dövrlərinin şərtləri və müddəti üzvlük zamanı müəyyən edilə bilər.
Avropa Komissiyası həmçinin gələcək üzvlük müqavilələri ilə iqtisadiyyat, daxili bazar, ədliyyə və daxili işlər sahələrində qoruyucu mexanizmlərin gücləndiriləcəyini bildirib. Bu mexanizmlərin tətbiq oluna biləcəyi müddətin də üzvlükdən sonra əhəmiyyətli dərəcədə uzadılması nəzərdə tutulur.
Qeyd edək ki, Macarıstanın xarici işlər naziri Peter Siyarto daha əvvəl Ukraynanın Aİ-yə qəbulunun birlik üçün mənfi nəticələr doğura biləcəyini bildirmişdi.
20:02 06.10.2026
Oxunuş sayı: 45
