İƏT nazirləri Pakistanda toplaşdı: İslam dünyasını nə gözləyir?
Müasir beynəlxalq münasibətlər sistemində regional iqtisadi əməkdaşlığın genişləndirilməsi, nəqliyyat-kommunikasiya xətlərinin inkişafı, enerji təhlükəsizliyinin təmin olunması və yeni ticarət imkanlarının yaradılması dövlətlər üçün xüsusi əhəmiyyət daşıyır. Bu baxımdan, İqtisadi Əməkdaşlıq Təşkilatı (İƏT) üzv ölkələr arasında iqtisadi inteqrasiyanın gücləndirilməsi və ortaq maraqların reallaşdırılması üçün mühüm platformalardan biri hesab olunur.
Pakistanın paytaxtı İslamabadda keçirilən İƏT Nazirlər Şurasının 30-cu iclasında Azərbaycanın da iştirakı regional əməkdaşlıq gündəliyi baxımından diqqət çəkir. İclasda iqtisadi-ticarət əlaqələrinin genişləndirilməsi, nəqliyyat, enerji və rəqəmsallaşma sahələrində əməkdaşlıq imkanları, eləcə də təşkilatın institusional inkişafı məsələləri müzakirə olunub. Xüsusilə Azərbaycanın regional nəqliyyat və enerji layihələrində iştirakı ölkəmizin bu əməkdaşlıq çərçivəsindəki rolunu daha da aktuallaşdırır.
Bəs İƏT çərçivəsində əməkdaşlığın genişləndirilməsi üzv dövlətlər üçün hansı yeni iqtisadi imkanlar və perspektivlər vəd edir? Bu platforma regional ticarətin, investisiya mühitinin və nəqliyyat-logistika əlaqələrinin inkişafına necə töhfə verə bilər? Azərbaycanın təşkilat çərçivəsində fəallığı ölkəmizin iqtisadi və strateji maraqlarına hansı üstünlükləri qazandıra bilər?

Mövzu ilə bağlı Crossmedia.az-a açıqlama verən sabiq xarici işlər naziri Elmar Məmnədyarov qeyd edib ki, müsəlman ölkələri arasında əməkdaşlığın nə qədər güclü və səmərəli olması bütövlükdə İslam dünyasının inkişafı və beynəlxalq mövqeyinin möhkəmlənməsi baxımından mühüm əhəmiyyət daşıyır: “Hesab edirəm ki, müsəlman dövlətləri arasında birlik və həmrəylik nə qədər yüksək səviyyədə olarsa, bu, həm İslam dünyası, həm də ayrı-ayrı üzv ölkələr üçün bir o qədər faydalı olar. Azərbaycan da İslam dünyasının ayrılmaz tərkib hissəsidir və bu əməkdaşlığın güclənməsi ölkəmizin maraqları baxımından da mühüm əhəmiyyət kəsb edir. İlk növbədə, hesab edirəm ki, hər hansı beynəlxalq təşkilatın güclü olması onun üzv dövlətlərinin də imkanlarının genişlənməsinə və mövqelərinin möhkəmlənməsinə müsbət təsir göstərir. Təşkilat nə qədər güclü, fəaliyyətində nə qədər ardıcıl və effektiv olarsa, üzv ölkələr arasında əməkdaşlıq da bir o qədər inkişaf edər. Bu baxımdan, müsəlman ölkələrinin ortaq maraqlar ətrafında birləşməsi, qarşılıqlı dəstək və həmrəyliyin gücləndirilməsi vacibdir. Belə əməkdaşlıq həm Azərbaycanın, həm də bütövlükdə İslam dünyasının beynəlxalq müstəvidə mövqelərinin möhkəmlənməsinə töhfə verə bilər”.
Ayhan
15:50 18.11.2026
Oxunuş sayı: 90