ABŞ İranın hücumlarının hamısının qarşısını alıb: Bundan sonra nə olacaq?
İranla ABŞ arasında baş verən 40 günlük müharibə tərəflərin hərbi imkanlarını, xüsusilə raket və pilotsuz uçuş aparatlarının müasir müharibələrdəki rolunu bir daha gündəmə gətirib. Müharibə ərzində qarşılıqlı hücumlar, hava hücumundan müdafiə sistemlərinin fəaliyyəti və hərbi obyektlərə endirilən zərbələrlə bağlı müxtəlif məlumatlar yayılıb. ABŞ Prezidenti Donald Tramp İranın ABŞ-yə və müttəfiqlərinə qarşı raket və pilotsuz uçuş aparatları ilə həyata keçirdiyi hücumların böyük əksəriyyətinin qarşısının alındığını bildirib. Bu açıqlama isə İranın raket və dron arsenalının real effektivliyi, eləcə də ABŞ-nin hava hücumundan müdafiə imkanları ilə bağlı müzakirələri yenidən aktuallaşdırıb. Görəsən, Trampın səsləndirdiyi fikirlər hərbi reallığı nə dərəcədə əks etdirir? Əgər İranın hücumlarının böyük hissəsi zərərsizləşdirilibsə, bu, onun raket və dron texnologiyalarının effektivliyi barədə hansı nəticələri ortaya qoyur? Müasir müharibələrdə bu silahların real təsir imkanlarını necə qiymətləndirmək olar?
Mövzu ilə bağlı Crossmedia.az-a açıqlama verən politoloq Əli Zülfüqaroğlu qeyd edib ki, Trampın bu açıqlamasını birmənalı şəkildə nə təsdiqləmək, nə də inkar etmək mümkündür: “Çünki istər İranla ABŞ arasında baş verən müharibə, istərsə də dünyanın müxtəlif bölgələrində yaşanan qarşıdurmalar zamanı ziddiyyətli məlumatlar geniş şəkildə dövriyyəyə buraxılır. Bir sıra hallarda bu məlumatların nə dərəcədə doğru olduğunu müəyyənləşdirmək və təsdiqləmək kifayət qədər çətin olur. Əlbəttə, ABŞ-nin hava hücumundan müdafiə sistemləri İranın hücumlarına qarşı bir sıra hallarda effektiv fəaliyyət göstərib. Bununla yanaşı, İran da ABŞ-nin Yaxın Şərqdə yerləşən bir sıra hərbi obyektlərinə ciddi zərbələr endirə və müəyyən ziyan vura bilib. Fevral ayında başlayan və 40 gün davam edən müharibənin nəticələrini bu kontekstdə qiymətləndirsək, Trampın açıqlamasının tamamilə həqiqəti əks etdirdiyini söyləmək çətindir”.

Politoloq qeyd edib ki, ABŞ İranın raket və dron hücumlarının demək olar ki, hamısını, təxminən 100 faizə yaxın göstərici ilə zərərsizləşdirib: “Lakin müharibənin gedişatı göstərir ki, həm ABŞ, həm də İran qarşılıqlı hücumlar nəticəsində bir-birinə kifayət qədər ciddi zərər vurmağı bacarıb. Buna görə də Trampın səsləndirdiyi rəqəmlərə ehtiyatla yanaşmaq və onları müharibənin real nəticələri ilə müqayisəli şəkildə qiymətləndirmək lazımdır”.
Ayhan
14:40 18.11.2026
Oxunuş sayı: 271