2025-ci illə bağlı iqtisadi prioritetlər açıqlanıb
Prezident İlham Əliyev yanvarın 7-də yerli televiziya kanallarına müsahibəsində mühüm məqamlara toxundu. Dövlət başçısı 2024-cü ilin iqtisadi yekunlarını müsbət qiymətləndirərək, Azərbaycanın iqtisadi inkişafda əhəmiyyətli nailiyyətlər əldə etdiyini vurğuladı. O bildirdi ki, ümumi daxili məhsulun 4 faizdən çox artması, xüsusilə qeyri-neft sektorundakı 6 faizdən çox, qeyri-neft sənaye sektorundakı 7 faizdən artıq inkişaf, ölkənin iqtisadi dayanıqlığını nümayiş etdirir. Dövlət başçısı bildirib ki, iqtisadi inkişafın təməlində düşünülmüş iqtisadi siyasət, şəffaflıq və inhisarçılığa qarşı mübarizə dayanır.
Prezidentin sözlərinə görə, əldə olunan iqtisadi nailiyyətlər yalnız ötən ilin deyil, uzun illər ərzində aparılan sistematik islahatların nəticəsidir. 2025-ci ildə də bu inkişafın davam etdirilməsi, qeyri-neft sektorunun genişləndirilməsi və sosial proqramların daha fəal şəkildə icra edilməsi prioritetlər sırasında yer alır.
Milli Məclisin deputatı Vüqar Bayramov, Crossmedia.az-a verdiyi açıqlamada, qeyri-neft sektorunun inkişafının Azərbaycanın prioritetləri arasında mühüm yer tutduğunu bildirib. Onun sözlərinə görə, “qeyri-neft sektorunun inkişafı həm ümumi daxili məhsulun, həm də fiskal gəlirlərin artırılması baxımından əsas hədəflərdəndir. 2024-cü ilin yekunları göstərir ki, dövlət büdcəsi gəlirlərində qeyri-neft sektorunun payında əhəmiyyətli artım var. Artıq büdcə gəlirlərinin yarısından çoxu qeyri-neft sektoruna məxsusdur, ÜDM-də isə qeyri-neft sektorunun payı 68 faizə yüksəlmişdir”.
Deputat əlavə edib ki, əsas hədəflərdən biri də ixracatda qeyri-neft sektorunun payını artırmaqdır: “Bunun üçün qeyri-neft sektorunda məhsul istehsalının genişləndirilməsi və həmin məhsulların ixracının artırılması vacibdir. Bu istiqamətdə davamlı siyasət aparılması iqtisadiyyatın şaxələndirilməsi və dayanıqlığının təmin edilməsinə xidmət edir”.
V. Bayramovun fikrincə, 2025-ci ildə də bu istiqamətdə səylərin artırılması, qeyri-neft sektorunda daha çox dəyər yaradılması və iqtisadiyyatın dayanıqlığının möhkəmləndirilməsi əsas prioritet olacaq. Deputat vurğulayıb ki, belə yanaşma qeyri-neft sektorunun inkişafını təmin etməklə yanaşı, iqtisadiyyatın şaxələndirilməsinə və uzunmüddətli uğurların qazanılmasına imkan yaradacaq.
Nihat Tahirov
10:40 08.01.2025
Oxunuş sayı: 5420
