Ermənistan ordusunda dəhşətli ölüm statistikası - XALQ AYAQLANDI
Ermənistan Silahlı Qüvvələrində 2026-cı il yanvarın 1-dən sentyabrın 22-dək 34 ölüm hadisəsi qeydə alınıb. Ermənistan hüquq müdafiəçisi Artur Sakuntsun təqdim etdiyi statistikaya görə, bu ölümlərin 14-ü hərbi xidmətlə əlaqəli olub. Xidmətlə əlaqəli ölüm hallarının 7-si intihar, 3-ü qətl, 2-si sağlamlıq problemi, 1-i avtomobil qəzası, 1-i isə silah-sursatla davranış qaydalarının pozulması nəticəsində baş verib. Eyni statistikada xidmətlə əlaqəsi olmayan hallar arasında da 2 intihar göstərilir. Beləliklə, ilin əvvəlindən sentyabrın 22-dək Ermənistan ordusunda ümumilikdə ən azı 9 intihar hadisəsi qeydə alındığı bildirilir. Xidmətlə əlaqəli ölümlərin yarısının intihar kimi göstərilməsi isə orduda hərbi qulluqçuların təhlükəsizliyi, daxili münasibətlər və xidmət şəraiti ilə bağlı suallar yaradır.
Mövzu ilə bağlı Crossmedia.az-a açıqlama verən politoloq Elçin Xalidbəyli bildirib ki, statistik göstəricilər Ermənistan ordusunda mövcud problemlərin miqyasını göstərir:
"Statistikaya əsasən, hərbi xidmətlə bağlı ölüm hallarından 7-sinin intihar olması Ermənistan ordusundakı mövcud durumu aydın göstərir. Bu, Ermənistan ordusunda nizamnamədənkənar münasibətlərin geniş yayıldığına işarə edir. Əsgərlər arasında zorakılıq halları və zabitlərin əsgərlərə qarşı zorakılığı yüksək səviyyədədir ki, bu da hərbi xidmətdə olan əsgərlərin intihar etməsinə gətirib çıxarır. Bütün bunlar Ermənistan ordusundakı dözülməz şəraitin göstəricisidir və Ermənistanın ordu quruculuğu prosesində irəliyə doğru addım atmaqda çətinlik çəkdiyini sübut edir. Ordunun təchizatı, eləcə də nizam-intizamın təmin olunması kimi mühüm proseslər Ermənistan ordusundan hələlik çox uzaqdır. Rəsmi İrəvan nə qədər çalışsa da, yüksək döyüş qabiliyyətli ordunun yaradılması o qədər də asan məsələ deyil".
Politoloq qeyd edib ki, bu vəziyyət Ermənistan cəmiyyətində də ordudakı durumla bağlı neqativ yanaşmanın güclənməsinə yol açır: “Vaxtaşırı Ermənistan cəmiyyətində Paşinyan hakimiyyətinə qarşı məhz ordudakı vəziyyətlə bağlı etiraz aksiyaları keçirilir, zərərçəkənlərin ailələri müxtəlif tələblərlə çıxış edirlər. Bütün bunları ümumiləşdirdikdə görünür ki, Ermənistan ordusu hazırda iflas dövrünü yaşayır və bu situasiyadan qısa müddətdə çıxılması o qədər də inandırıcı görünmür”.
Zeynəb Həsən
14:30 28.09.2026
Oxunuş sayı: 48
