Marko Rubionun oğlunun oyunlarına səfərləri 1,2 milyon dollara başa gəlib
ABŞ-nin dövlət katibi Marko Rubionun oğlunun futbol oyunlarını izləmək üçün hərbi təyyarələrdən istifadə etdiyi səfərlərin də daxil olduğu uçuşların ümumi xərci 1,2 milyon dolları ötüb.
Crossmedia.az xəbər verir ki, “The Washington Post” bu barədə uçuş qeydlərinə əsaslanan araşdırma yayıb.
Məlumata görə, Rubio vəzifəyə başladıqdan sonra hökumətə məxsus təyyarələrlə Florida ştatının Geynsvill şəhərinə azı 23 dəfə səfər edib.
Bu səfərlərin 15-i ABŞ Dövlət Departamenti tərəfindən şəxsi xarakterli, digərləri isə şəxsi və xidməti məqsədli uçuşlar kimi təsnifləndirilib.
Rubio Geynsvillə səfərləri zamanı oğlu Entoni Rubionun da heyətində yer aldığı Florida Universitetinin futbol komandasının ən azı 10 oyununu izləyib.
“The Washington Post” ABŞ Müdafiə Nazirliyinin uçuş tariflərinə əsaslanaraq həmin səfərlərin ümumi xərcinin 1,2 milyon dollardan çox olduğunu hesablayıb.
Qeyd olunur ki, təhlükəsizlik tələblərinə əsasən, ABŞ dövlət katibi hökumət təyyarələrindən istifadə etməlidir. Şəxsi səfərlər zamanı isə onun dövlətə kommersiya aviareysinin ekonom sinif bileti dəyərində ödəniş etməsi tələb olunur.
Lakin Rubionun indiyədək bu səfərlərə görə nə qədər vəsait ödədiyi açıqlanmayıb.
ABŞ Dövlət Departamenti hərbi təyyarələrdən istifadənin təhlükəsiz rabitənin və dövlət idarəçiliyinin fasiləsizliyinin təmin olunması üçün zəruri olduğunu bildirib.
Rubio isə iş qrafiki imkan verdiyi müddətdə ailəsi üçün əhəmiyyətli tədbirlərdə iştirak etməyə davam edəcəyini qeyd edib.
14:24 12.11.2026
Oxunuş sayı: 35
