NATO hərbi strategiyasını dəyişir – Əsas hədəf Avropa
NATO Rusiyadan qaynaqlanan təhlükələri nəzərə alaraq hərbi planlaşdırma sistemində son 20 ilin ən böyük dəyişikliklərindən birini həyata keçirməyi nəzərdən keçirir.
Crossmedia.az xəbər verir ki, “Politico” nəşri bu barədə məlumat yayıb.
Məlumata görə, NATO Avropada mümkün genişmiqyaslı müharibəyə hazırlığı əsas prioritetə çevirməyi planlaşdırır.
Alyansa üzv 32 ölkə yeni hərbi imkanların müəyyənləşdirilməsi ilə bağlı danışıqlara başlayıb. Müzakirələr zamanı mümkün münaqişə şəraitində üzv dövlətlərin hansı hərbi qüvvələri, silahları və maliyyə resurslarını təqdim edəcəyi nəzərdən keçirilir.
Hazırkı tələblərə əsasən, NATO ölkələri həm Avropada genişmiqyaslı müharibəyə, həm də xaricdə bir neçə kiçik hərbi əməliyyata eyni vaxtda hazır olmalıdırlar.
Yeni təklif isə bu yanaşmanın dəyişdirilməsini nəzərdə tutur. Belə ki, üzv ölkələrdən hər iki ssenariyə eyni vaxtda hazır olmaq əvəzinə, onlardan biri üzrə hərbi imkanları təmin etmək tələb oluna bilər.
Bu dəyişiklik NATO-nun əsas diqqətini Avropanın müdafiəsinə və Rusiyadan gələn potensial təhlükələrin qarşısının alınmasına yönəltməsinə imkan verə bilər.
Nəşr qeyd edir ki, yeni yanaşma İraq və Kosovo kimi bölgələrdə davam edən NATO missiyalarının avtomatik dayandırılması demək deyil.
Məlumata görə, müzakirələrin 2027-ci ilin fevralınadək yekunlaşdırılması, yeni hərbi imkanlarla bağlı tələblərin isə 2029-cu ilədək müəyyən edilməsi nəzərdə tutulur.
Hələlik təkliflə bağlı yekun qərar qəbul edilməyib.
14:12 12.11.2026
Oxunuş sayı: 45
