Cəmiyyət

Hündürmərtəbəli binalarda uşaqların təhlükəsizliyi necə qorunmalıdır?

Son vaxtlar hündürmərtəbəli binalardan yıxılan uşaq və yeniyetmələrlə bağlı hadisələrin baş verməsi yaşayış binalarında təhlükəsizlik məsələsini yenidən gündəmə gətirir. Xüsusilə çoxmənzilli binalarda açıq pəncərələr, qorunmayan eyvanlar və təhlükəsizlik standartlarına uyğun quraşdırılmamış pəncərə sistemləri uşaqların həyatı üçün ciddi risk yaradır. Bəzən bir anlıq diqqətsizlik və ya böyüklərin nəzarətindən kənarda qalan kiçik bir uşaq geri dönüşü olmayan faciə ilə nəticələnə bilər.

Müasir şəhərsalma şəraitində hündürmərtəbəli binaların sayının artması bu problemin əhəmiyyətini daha da yüksəldir. Mənzillərdə pəncərələrin geniş olması, eyvanların müxtəlif məqsədlərlə istifadə edilməsi, uşaqların asanlıqla pəncərə və eyvanlara yaxınlaşa bilməsi təhlükəsizlik tədbirlərinə xüsusi diqqət yetirilməsini tələb edir. Xüsusilə azyaşlı uşaqlar təhlükənin miqyasını dərk etmədikləri üçün pəncərə kənarına çıxmaq, eyvanda oynamaq və ya mebel vasitəsilə pəncərəyə qalxmaq kimi davranışların hansı nəticələrə səbəb ola biləcəyini anlamırlar.

Burada məsuliyyət yalnız valideynlərin diqqəti ilə məhdudlaşmır. Yaşayış binalarının layihələndirilməsi və tikintisi zamanı təhlükəsizlik tələblərinə əməl olunması, pəncərə və eyvanların qoruyucu mexanizmlərlə təchiz edilməsi, binadaxili təhlükəsizlik standartlarının tətbiqi də vacibdir. Təəssüf ki, bəzən mənzil təmir edilərkən və ya pəncərələr dəyişdirilərkən estetik görünüş və rahatlıq təhlükəsizlikdən üstün tutulur. Nəticədə uşaqların sərbəst hərəkət etdiyi evlərdə qarşısı alına biləcək təhlükələr yaranır.

Digər tərəfdən, yeniyetmələrlə bağlı hadisələrə yanaşma da fərqli və diqqətli olmalıdır. Yeniyetmələrin davranışları, psixoloji vəziyyəti, riskləri qiymətləndirmə qabiliyyəti və təhlükəli vəziyyətlərə reaksiyası ayrıca nəzərə alınmalıdır. Hər hadisənin səbəbini araşdırmadan ümumi nəticəyə gəlmək doğru deyil. Lakin bütün hallarda yaşayış mühitində təhlükəsizliyin təmin edilməsi və risklərin əvvəlcədən aradan qaldırılması əsas prioritet olmalıdır.

Təhlükəsizlik eksperti Elmar Nurəliyev Crossmedia.az-a açıqlamasında bildirib ki, çoxmənzilli yaşayış binalarında azyaşlı uşaqların olduğu evlərdə valideynlər təhlükəsizlik tədbirlərinə xüsusi diqqət yetirməlidirlər:

“Bu tədbirlər mümkün bədbəxt hadisələrin qarşısını almaq baxımından vacibdir.

İlk növbədə, eyvan qapılarının möhkəm və dayanıqlı olmasına, kilid sistemlərinin isə uşaqların əli çatmayan yerdə yerləşdirilməsinə diqqət yetirilməlidir. Müasir dövrdə bunun üçün müxtəlif texnoloji imkanlar və təhlükəsizlik sistemləri mövcuddur.

Eyni zamanda, eyvanlarda yıxılma riskini azaltmaq üçün qoruyucu dəmir barmaqlıqlardan, xüsusi torlardan və ya eyvanı şüşə ilə bağlamaq üçün nəzərdə tutulan sistemlərdən istifadə etmək olar. Bu vasitələr həm uşaqların eyvandan yıxılmasının qarşısını alır, həm də eyvanı hava şəraitinin təsirlərindən qoruyur.

Əsas məsələ odur ki, evdə azyaşlı uşaq varsa, valideynlərin diqqətindən kənarda qalan qısa müddət belə təhlükəli nəticələrə səbəb ola bilər. Buna görə də eyvanla yanaşı, digər pəncərələrin də kilid sistemləri möhkəm və etibarlı olmalıdır.

Ümumilikdə, evdə uşağın təhlükəsizliyi üçün bütün risklər nəzərə alınmalı və müvafiq tədbirlər kompleks şəkildə həyata keçirilməlidir. Məsələn, uşaq dolabın, tumbanın və ya şkafın üzərinə çıxmağa cəhd edə bilər. Üzərindəki suvenir, qab-qacaq və digər əşyalar uşağın üzərinə düşərək xəsarət yetirə bilər. Hətta mebelin aşması da ciddi təhlükə yarada bilər. Buna görə şkaf və dolablar divara möhkəm bərkidilməli, onların üzərində ağır və təhlükəli əşyalar saxlanılmamalıdır.

Bundan başqa, bıçaq, qayçı və digər kəsici-deşici alətlər uşaqların əli çatmayan, kilidli yerlərdə saxlanılmalıdır. Əks halda, uşaq bilmədən həm özünə, həm də evdəki digər şəxslərə xəsarət yetirə bilər.

Dərman vasitələri və kimyəvi tərkibli məişət məhsulları da uşaqlar üçün əlçatmaz yerlərdə saxlanılmalıdır. Bu vasitələrin yerləşdirildiyi dolabların kilid sistemi möhkəm və etibarlı olmalıdır. Çünki uşağın belə maddələri əlinə keçirməsi zəhərlənmə və digər bədbəxt hadisələrlə nəticələnə bilər.

Hesab edirəm ki, bu cür təhlükəsizlik tədbirləri kompleks şəkildə həyata keçirilməlidir. Xüsusilə elektrik təhlükəsizliyinə diqqət yetirilməli, uşaqları elektrik vurmasından qorumaq üçün xüsusi qoruyucu vasitələrdən istifadə olunmalıdır. Elektrik avadanlıqları və digər məişət cihazları da təhlükəsiz şəkildə istismar edilməlidir.

Bütün bu tədbirlərin birlikdə görülməsi evdə azyaşlı uşaqların təhlükəsizliyinin təmin olunması və bədbəxt hadisələrin qarşısının alınması baxımından daha məqsədəuyğundur”.

Məhəbbət Tərlanoğlu

🖨 Çap et

11:30 12.11.2026

Oxunuş sayı: 40